得利集團（897）大股東噚日配售60億股咁多，股價竟然勁升73.8%，但係經紀陳同小初講，千祈唔好亂掂，皆因大戶自己玩晒，小初之流一定唔夠人哋玩。
得利噚日收7.3仙，較批股價1仙，足足升咗6倍有多，雖然成交股數有成61.76億股咁多，但有60億股係批股，並非經自動對盤上板，街貨成交唔夠兩億股。
經紀陳話，炒家成本咁低，股價又升到咁高，佢只要沽一部份已經賺大錢，根本不必沽晒。此外，得利大股東宏安（1222），原本有一手6400萬元嘅可換股債券，但佢以期權方式賣咗，即係話，就算呢手貨散晒，重有另外一批平貨可出街。所以話，得利點會係散戶玩得起嘅股票？
另外，噚日一齊急升重有賣盤成功嘅金科數碼（922），升幅高達40％，收18.9仙，但成交只有51萬元。
慕容小初