美股上周五狂升，經周初兩日急跌，杜指升幅所剩無幾，而標普500及納指更要嘔突，美股再度考驗近期低位，希望美股噚晚可以喘定，對港股今日走勢有幫助。
相對於外圍股市，港股噚日表現算硬淨，恒指只跌55點，收10787，但成交不足50億元，反映大部份投資者睇多過做。
不過，成交稀疏有利大戶維持秩序，恒指噚日力守20日線（現處10737）支持，9RSI亦險守50中軸，技術未變壞。港股今日升或跌，影響技術指標向好定向淡，對後市有相當大啟示。如果恒指今日繼續跌及跌幅擴大，9RSI將跌穿50中軸及20日線失守，下試10600或以下機會大增；相反則先衝破萬一關成數高啲。
近日長科（8222）及中銀先後招股上市，中銀size大，地位特殊，係基金嘅必然選擇，大市營造良好氣氛招股，似乎更符合各方面利益。因此，相信只要外圍唔出現大變化，港股可反覆向好。
如果今日港股如預計中向好，趙飛雲會伺機買入恒指Call輪9201，或者撈番啲新地Call輪9371，若大市冇乜升跌，則買多1000股新地（016）正股。
趙飛雲