美股又散過，港股冇法子唔跌，尾市有趁低吸納盤進場，恒指跌55點，總算相對硬淨。大隻嘢中，長實（001）叫做逆市而升，可能長科（8222）招股反應唔錯，有啲刺激。有人透過國際配售落標申請500萬股，你估獲配幾多？答案係6萬股咁大把。長科下禮拜掛牌，若然靚靚，長實都有得益。長科上市，每股長實身家至少增加2元。
長實升0.50元，28件Call輪中，只有12件有得升。升得最多嘅係9084，收46仙，升7%，有兩球幾易手，下月中夠鐘，溢價2.4%，槓桿率14.5倍。
交投最旺嘅長實Call輪9252，則反跌2仙，收64仙。9月初到期，溢價2.3%，槓桿率10.4倍。呢件買賣容易，最啱短炒，有時一兩日之間已經可以走完一轉，65仙以下買入，75仙嗰頭走人，實行炒波幅。
唔計9字頭嘅藍籌Call輪，升得最勁嘅係2305呢件中華城市燃氣（603，前身光通信）公司輪。2305收5仙，升39%，有8球易手，明年底到期，溢價54%，槓桿率2.8倍。正股升1仙，隻輪升2仙，升過籠，唔博得過。
章 盛