張栢芝最近因為和謝霆鋒分手而情緒失控，日前她接受商台訪問時，承認突然暴瘦是因為失眠，皆因有心事未能放低，每天醒來便有心酸的感覺，但現時她已經懂得釋放自己，成功克服失眠。
張栢芝在昨日播出的商台節目《樂人谷》錄音訪問中，披露自己受情變新聞困擾，導致經常失眠。
栢芝說：「之前瞓唔到呀，𠵱家就好啲啦，嗰陣時點解瘦得咁犀利，就係因為失眠，人哋問我點減肥，又唔知點同人講，教人哋又好似唔健康喎，冇理由叫人哋一個月唔好瞓㗎。嗰陣時失眠好辛苦呀，𠵱家冇啦。之前瞓唔到以為自己冇事，但其實心裏面一直有好多嘢，所以瞓唔到，但𠵱家啲嘢放晒出嚟，瞓得好甜。」
栢芝續說：「之前想過搬出去，以為間屋令到我瞓唔到，但原來唔關間屋事，其實係有心事未放低，但𠵱家開始化緊啦，都七七八八㗎啦，但都係要接受囉，做得呢行都要接受㗎啦，冇辦法。
「最慘就係我以前唔似呢排咁辛苦，嗰陣時瞓醒就冇事。但係先前嗰幾個月，嗰種心酸就會喺你瞓醒第一時間嚟搵你，好辛苦呀。𠵱家佢（指心酸）都會搵我，但我身體戰勝咗，我唔歡迎佢，𠵱家開始慢慢走開啲嘞，之前真係追埋嚟呀。」
此外，陳小春昨日在電視城出現，對於有報道指小春欲『番兜』追回栢芝，小春昨日說：「『番兜』吖嘛，我冇睇段報道，既然佢知我想『番兜』，以後有小春嘅嘢，問番寫嗰個人，連我心裏面下一步想做乜都知。好在佢唔係差人啫，咁俾人屈法，即刻入罪都有份。」
問小春可有致電問候栢芝？他說：「我自己都冇時間瞓覺，重走去問？佢只係一個二十、廿一歲嘅女仔，繼續迫佢，即係唔係人，明知佢咁慘，真係想佢死咩？」
採訪、攝影：卓美娟