昨日講問責局長上場之後，人人要爭取評分，猶如每年國際賽馬或者打吡，好多靚馬都要爭取高評分，愈高愈好，先至可以得到評磅員青睞。問責局長嘅評分如何決定呢？可能第一要民望高（如最近葉劉淑儀嘅民意），第二要有實際「業績」（如馬時亨保留上市委員會，市場人士讚好）。既然要炮製民意，頻頻出鏡都係必需手段之一，故此近星期咁多問責局長接受訪問，就係咁解。
不過政治新聞，從來都唔係銷紙嘅靈藥，過咗七月，熱潮過後，啲局長想搵人注意，唔係咁易。政治記者亦不可沖昏了頭腦。全世界都係一樣，做公關宣傳嘅主要原則，就係有好嘢就搏命講，問題係：好嘢在哪裏？即係老布殊以前競選總統之時嘅一句流行口號：Whereisthebeef？𠵱家董特首以至眾司長局長都冇「好嘢」講，冇實際政策提出來，點樣做宣傳公關呀？局長們上電台電視台，講來講去，口裏淡出鳥來，Whereisthebeef？再講落去，任蔡瑩璧點樣工於心計，都會吹牛吹穿窿，令市民反感㖭。
目前正是局長、傳媒互相利用之時，行內人特別亢奮。高潮過後，傳媒唔會有乜特別損失，反而啲局長一個唔小心就會墮馬，休養三個月，點樣爭取評磅員增加評分呀？