巴黎03年春夏男裝FashionWeek剛於上周結束，論熱鬧與洶湧程度，男裝始終不及女裝Show，但場內場外同樣型人匯集。經常覺得騷前騷後的觀眾真人Show，分分鐘更好睇精采兼實用，事關貓行新裝有排都未有得買，睇會場各大時裝記者與買手行頭，反而更知今季潮流。總結睇Show的型仔靚女，發現簡約始終係主流，而以下三項特徵打扮視為巴黎睇Show至熱項目，若嫌夏季時裝經已着到悶，未轉秋季前亦不妨跟跟。
記者、攝影：梁珮瑜
在DirkSchonberger男裝展會場外發現BradPitt！查實是貌似Pitt仔的型男。「我係HelloKitty擁躉，件KittyT恤響香港買㗎！」翻版Pitt仔更開心地展示牛仔背心上的襟章畀記者睇，二十多個襟章中有一半以上都係吉蒂！
卡通漫畫成為時裝潮流唔算新鮮，例如古着米奇老鼠Tee，早已被日本型人及香港陳慧琳捧成流行項目。而日本與香港的紅牌阿姑HelloKitty，今勻亦入侵巴黎街頭，除了在一些舖頭發現吉蒂產品，就連多位睇Show型人亦以Kitty襯衫。所以唔好再話HelloKitty係女生小玩意，佢早已成為時裝潮流！
不論在LouisVuitton時裝展或其他Show場中，亦有不少手持或孭住LV袋的型人。看來LV袋仍然是袋界的中流砥柱，唔怕Common唔怕撞，只因自信襯得好啱自己。其實LV袋是長青經典物，能配合一身衣着就實在百搭有型，但有如眾多香港人的觀音袋、掃把身就當然咪搞。
LouisVuitton男裝展的後台，女士們大多掛上LV至新款式，尤其是限量版勁斷的ContedeFees拼圖袋，絕對係身份象徵。而右面的女士亦有最新款的MiniMonogram手袋撐場。
綜觀各位LV黨男士，首選必然是Damier的斜孭，事關格仔系列感覺最為Man，斜孭方式亦至受男士歡迎。
睇完多個男裝FashionShow，發覺設計師今季都喜愛用口靚仔做Models。男模個個似細路兼青靚白淨，身穿T恤牛記波鞋是標記，但鬆身闊褲Hip-HopLook無蹤影，FittedSize與直腳褲係男模潮流，當中更有好多男模完Show後踏住滑板或Roller-skates走人。
男裝衣衫一向變化不大，變化多在細節及顏色處。03春夏男裝各家亦有不同的風格及用色，但大多以Well-fitted及四季都不能缺的黑或白為主。而最令人耳目一新的男裝，相信是MarcJacobs主理的LouisVuitton，搶眼顏色與運動主題均帶來新鮮感，想睇就要留意本報以後的報道。