【記者卓寶花、陳偉權塞班直擊】無綫「2002年度香港小姐競選」進行得如火如荼，大會正安排咗二十位佳麗喺塞班拍外景，佢哋噚日繼續着住泳衣拍攝。
眾佳麗噚日玩完水上電單車同香蕉船等水上活動，然後又再玩埋小型賽車，認真活力充沛。
大會安排二十位佳麗着住熱褲，以「牛女look」打扮玩小型賽車，當眾佳麗上落車嘅時候，由於熱褲太短，幾位佳麗都先後春光乍洩，4號劉啟兒話：「可能因為玩小型賽車要擘髀，咁我下次會小心啲。」
而二十位佳麗着上一件頭泳衣時，三圍34、23、33嘅17號劉若莉依然係最搶鏡嗰個。
當8號葉凱茵坐獨木舟影相時，就俾港姐保母阻止。事後8號葉凱茵話：「我唔知唔可以坐低影相，大家知我唔係想搶鏡，我想轉甫士啫。」
章子怡同劉燁𠵱家喺上海拍緊電影《紫蝴蝶》，套戲係以二、三十年代為背景。
電影公司唔想章子怡嘅造型曝光，所以佢出入都有人陪住，重有人負責同佢遮面。而劉燁早幾日就去咗南京拍戲，佢牙痛不過冇時間睇醫生，最後自己剝咗隻牙，搞到發高燒，真係慘情。
關心妍噚日去尖沙嘴新冶餐廳出席唱片公司三周年慶典，同時亦都係佢嘅新唱片發布會。小雪同女子組合B2都有出席，而關心妍喺台上答謝老闆羅傑承栽培時邊喊邊話：「好開心，自己做歌手嘅夢想終於成真，就好似白雪公主一樣。」小雪同B2俾關心妍搶晒風頭，不過佢哋話唔介意喎！
林憶蓮一向少提家事，近日佢喺內地舉行巡迴演唱會時，就唱咗首佢個女鍾意、周杰倫原唱嘅《龍捲風》。憶蓮又突然喺觀眾面前答謝老公李宗盛，佢以普通話說：「李宗盛是我一生中最重要的男人，在我歌唱生涯中，有很多出色的音樂人幫助我，但有一個人寫了很多歌曲給我，最後我嫁了他。」
最近何潤東同邱澤主演嘅台灣劇《雪地裡的星星》喺台灣收視打低韓劇《冬日戀歌》（《藍色生死戀Ⅱ》），成為台灣收視最高劇集。何潤東、邱澤同埋劇中其他演員都不知幾開心。呢個消息傳到香港，幾間電視台就即刻搶住想買嚟播，唔知邊個會爭贏呢？
黃子華噚日喺電視城錄影無綫節目《一觸即發》，子華好開心咁同人話已經有參賽者攞到五十萬獎金，子華重話呢個節目愈嚟愈似婚姻介紹所，因為之前有位三十九歲嘅參賽者樣貌有啲似韓國女星金喜善，玩完遊戲之後，有個男參賽者特登喺門口等佢㖭。