潮流興懷舊，好多舊建築物都翻新作商業用途，歐華爾顧問公司董事羅健中似乎對警署情有獨鍾。佢最近就構思將灣仔警署變身為特色食肆，好似赤柱美利樓咁，遲啲會將建議交畀政府考慮。
羅健中對蘭西講，灣仔警署建築有風格，外形好特別，重夾處商業大廈同舊樓之間，做特色食肆就最好。
佢重話，灣仔最特別係新舊夾雜，大街小巷各有風情，好似利東街印喜帖嘅印刷舖開到成行成市，若重建就好可惜，市建局做市區重建未必要收購全部業權，應該畀唔想搬走嘅阿婆、阿公留低，收購到嘅單位翻新後租畀社區組織做辦事處，或租畀設計師做Studio同展覽場，令成條街更有生命力同人情味。
灣仔警署𠵱家重用緊，警匪片好多時都響呢度攞景，有人話假如改做特色食肆，警務人員會點呢？使唔使要由揸搶變成揸埋鑊鏟?
羅健中今次有呢個構思，其實係本地一班集建築、規劃、測量界有心人嘅自發建議。不過羅生之前為兩個建築物變身提出過構思，分別係將中環警署及域多利監獄重整為英國高雲花園式旅遊景點，以及將尖沙嘴前水警總部變為附有地下商場嘅酒店。
各大發展商旗下主要商場，暑假都大搞活動。其中新地4個商場今個禮拜五開始，舉行為期一個月「生命共嚐」美食展，推廣香港不同傳統食品同特色小吃。逢周末重有影視紅星做嘉賓，同現場觀眾一齊學烹飪、又義賣慈善抽獎券。表面睇個活動同「生命」拉唔上關係，但原來今次活動係幫預防自殺機構「生命熱線」籌募經費。各位有乜唔開心，一於去美食展，化悲憤為食量，唔好自殺咁儍。
香港搵食愈嚟愈艱難，今年重超越日本成為全球生活開支最昂貴嘅城市，恒基張炳強噚日就話，睇嚟個指數都好難跌，佢重搬出自己一套見解，話睇發展商畀代理嘅佣咁高，有乜辦法生活指數唔高呢？蘭西心諗，假如發展商平啲賣樓，生活指數咪可以下降囉！唔知佢哋點睇呢？
講到本港經濟，中原施永青就話美元弱勢令到港元都貶值，但投資者重係寧願將啲錢擺響銀行，原因係缺乏投資機會。老施指本港經濟唔掂係內部消費不振所致，佢建議規定打工仔要將收入七成用嚟消費，本港經濟就即刻會好番。
好多香港人學生時代都有睇《讀者文摘》，日前在該集團駐港總部筲箕灣讀者文摘大廈招租活動，中原施永青話小學六年班到中三都係《讀者文摘》嘅超級fans，而本書係亞洲區有中文、英文同泰文版，合共有470萬名讀者，但蘭西就誤會咗係全球讀者數目，Sorry！
蘭西
電郵地址：