唔好以為做新官一定有「honeymoon」，新上任的政制事務局局長林瑞麟，噚日第一次出戰立法會，喺事務委員會解畫，就俾議員大彈表現差勁。劉慧卿多番質疑，已上任嘅問責官員，為何要用一個月申報利益？其間未搞清利益衝突點算？咁做係咪唔尋常？
林局長避重就輕，話新同事未習慣政府處理文件程序，絕無不尋常，當局會在七月底公布申報資料給公眾查閱。卿姐一於窮追猛問六次，局長點可以「孭住利益衝突喺身」，而林瑞麟則不斷重複政府原則。
卿姐老友何秀蘭也忍不住，叫林局長應該「開心見誠，坦白啲」，但林D9「好似擠牙膏，擰嚟擰去都擠唔出嘢」。
林瑞麟聞言扯火，表明自己沒有半點兒錯誤，還叫何議員提出有何錯處。好有火藥味。
身兼支聯會主席司徒華梗係關心民主派返內地的問題，佢問林瑞麟，會唔會好似孫公，會向中央提及此事同主動滙報進展。林瑞麟話好關心呢個議題，但特區和中央溝通就不便公開，嘩！又想卸膊。
工商及科技局局長唐英年表現也麻麻，話說有記者問開tom.com單嘢，一個機構擁有多過一個傳媒，這情況是否健康？唐公子就話「壹傳媒」都有報紙、雜誌。人家問跨媒體喎，問買多個電視台喎，唐公子似乎搭錯訕哩。
講開呢單嘢，八方奇怪點解噚朝林伯個記者會冇咗新城個咪牌，唔通特登唔畀面李超人？原來係位秘書傑作，怕打擾林伯，死都唔畀由中環趕過去嘅新城記者入內，話之你係李家電台。
傳真︰2623-9278
電郵︰