謝霆鋒結束與張栢芝的短暫情緣後，近日情緒失控的栢芝，正身在上海拍攝新片《河東獅吼》。日前栢芝接受商台訪問時，承認用工作來麻醉自己，還哀求公司將工作排得密麻麻，因她不想有時間停下來思考，言語中間接承認與霆鋒分手。
謝霆鋒日前與張栢芝分手，結束二人間短暫戀情後，霆鋒更即與王菲復合。栢芝昨日在商台節目的錄音訪問中，表示自己近日不斷工作，是想令自己麻木，似在默認與霆鋒分手之事。現時身在上海拍電影的栢芝，在訪問中透露她將工作時間表排得密密麻麻，目的原來是為了麻醉自己。
栢芝笑說：「記得有一次夜晚落機，我司機嚟接我，喺機場出嚟向屋企方向行，我問司機車我去邊？因為我聽朝一早要拍廣告，所以佢以為我係返屋企，但其實我係要去中環錄嘢，佢就話：『你真係女版劉德華喎！』
「我承認喺呢段時間真係大個咗好多，其實比起我呢個年齡，我係成熟啲，我唔知點解轉變得好快。以前我成日都發脾氣，有時唔想做嘢，但𠵱家唔會囉，𠵱家公司求我放假，媽咪求我睇醫生，但係我求公司將工作塞密啲，我enjoy㗎。」
早前栢芝因情緒失控，令大家十分擔心，問到栢芝這樣投入工作是否刻意令自己麻木時，栢芝說：「呢個絕對係，因為我搵緊一個方法去控制自己，放喺一個重點度，因為我自己係一個多元化嘅人，如果我要做好多嘢，我可以做到。」
栢芝續說：「我同自己講，我要搵一個重點，其他乜嘢都唔好諗，咁我𠵱家搵到囉，同埋係百分百enjoy，呢一種感覺直情係重生呀，但係一停落嚟又唔知會變成點啦！」栢芝以工作麻醉自己，怪不得自九九年出道至今體重勁降。
而被問到有否覺得是因為自己得到太多，所以才會失去一些東西時，栢芝說：「係呀，呢個我一早接受，都一早知道。因為之前發生咗好多事，我身邊嘅朋友全部都支持我，絕對相信我。雖然我係冇乜朋友，但好開心喺呢段時間裏面識到阿車（車婉婉）同黎瑞恩佢哋，嗰種無形嘅精神支持，成個人舒服晒㗎。」