古天樂現於上海拍攝電影《河東獅吼》，昨日他則在上海外灘為《君子雜誌》拍照，對於羅嘉良傳婚變，更傳出宣萱介入一事，當年曾為嘉良婚禮任伴郎的古仔聞後即驚愕地說：「吓？我覺得嘉良係個好顧家嘅男人，我唔信佢會離婚，我識咗佢哋兩個成七年，呢啲係傳聞嚟㗎啫，等我了解下先啦。」
問到古仔會否致電嘉良和宣萱？古仔說：「唔需要吓吓打電話嘅，件事都唔係真嘅，圈外人就話唔清楚啫，圈內人就會清楚，其實近排我同佢哋都少咗聯絡，因為自己少咗返無綫拍劇，大時大節至會同佢哋見面。」
昨日古仔的無綫經理人Ronnie亦有陪伴在側，而Ronnie也為宣萱的前經理人，對於嘉良婚變，他只說：「傳聞嚟嘅啫，不能盡信，要了解吓先。」
記者何永寧上海直擊