問責高官上場之後，傳媒生態環境已經慢慢蛻變，有兩個迹象值得留意，本來左丁山呢啲笨人，唔多醒覺，好在身邊朋友眾多，其中有高人，高人身經百戰，認識高官之多，不可勝數，近年處於半退休狀態，得閒就同啲高官飲靚紅酒，畀意見，往往能觀察入微。
呢晚佢飲咗兩杯平價紅酒（主人家唔係高官，只能夠請飲兩百蚊一枝嘅大路貨，高人其實係飲慣兩千元一枝嘅），高人指點迷津：「問責高官要表現，要爭取民意，一定要得到傳媒曝光機會，既要維持出鏡頻率，亦要避免被報紙日鬧夜鬧，所以佢哋旁邊嘅新聞官及新聞處嘅操控媒體策略就非常重要，此其一；既然唔想俾人日鬧夜鬧，就要畀啲着數，如獨家放風喇、特別畀面啦，以示拉攏討好傳媒，此其二。啲政治新聞記者以後會好受重視㗎。」
經高人提點，翻閱近期報紙嘅取向，再聽吓其他老友啲見聞，得到嘅訊息係新聞處處長蔡瑩璧工於心計，製造「欺善怕惡」之計，凡係鬧得多嘅，就會得到採訪「優惠」（即係畀料快啲，安排採訪快啲，逢係《蘋果》與第二個爭，就叫《蘋果》做阿二），呢招暫見成效，新聞處新聞官嗅到嘅火藥味已經一日比一日少。最過癮嘅就係高人識得講：「佢哋研判一輪，認為肥佬黎嘅《蘋果》好大量，唔會因蝕底啲而鬧番轉頭。」