今日係我最後一日同大家介紹一哥楊貫一嘅拿手菜，呢味「阿一上湯炒飯」係我每次去一哥度食飯，都一定會點嘅美食嚟㗎。呢味飯好香口，我每次都可以食幾碗，如果屋企有小朋友唔肯食飯，不妨整呢味炒飯畀佢哋試試！正所謂「一哥炒飯唔會滯，食過世我都肯制」。
材料 ：熟鮮蝦粒半碗、葱粒半碗、叉燒粒半碗、炸米粉半碗、雞蛋兩隻、白飯五碗（可按個人份量而定）、瑤柱四至五粒（浸透後撕碎）、上湯（最好以老雞及金華火腿熬成，而罐頭上湯亦可）、生油
製法 ：將雞蛋攪成漿狀，備用。放一湯匙生油入鑊，然後落雞蛋、白飯、瑤柱及叉燒去炒，再落一湯匙生油，然後放葱、炸米粉及蝦粒，再加三湯匙上湯，再炒四至五分鐘就搞掂。
（五之五）
口述：陳松伶
筆錄：戴彩煥
攝影：仇志德
顧問：楊貫一
明日預告：毛舜筠