【本報訊】李嘉誠旗下的tom.com昨晚發表聲明，表示已訂初步意向書，擬斥資二億九千萬元及七千萬向林百欣家族控制的麗新發展及豐德麗分別購入百分之三十二點七五亞視股權及五成的亞視網站股權。所有交易金額俱以發行tom新股支付。同時，該項交易要待政府批准後方可作實。兩間上市公司昨日在聯交所停牌暫停買賣。林建岳父親、麗展名譽主席林百欣昨晨宣稱對有關交易毫不知情，只是從兒子的助手得知有關交易正洽商中。
林百欣昨日被記者問及經營亞視多年是否毫無感情？他笑着形容：「問我要亞視定要錢，梗係錢啦。喺亞視咁多年蝕咁多年，好似潑出去嘅水；有冇感情？做生意冇所謂喇；算唔算投資失敗？我都蝕咗十幾億，從未收過錢，有出冇入。我唔在行，就算交學費都學唔到嘢。不過，蝕十億、八億唔係好大件事。」
林百欣昨日兩度召開記者會，宣稱不知道麗展擁有的亞視股份賣給tom.com的詳情，他指這些股份早已送給兒子林建岳（Peter），連兒子亦對他隱瞞有關交易。
tom.com昨晚則發表聲明表示，已與麗新集團簽署諒解備忘錄，以總代價3.6億元向其購入全數持有的百分之三十二點七五亞洲電視權益，及五成亞洲電視網站HKATV.com權益。代價全數以tom.com新股支付，交易完成後麗新集團，將持有一億股tom.com。
根據建議，tom.com先向麗新發展購入的亞洲電視權益，代價2.9億元，以每股作價三點三三元計算，合供向麗展發行八千七百二十萬股新股，作價較昨日收市價三點三二五元有溢價百分之零點一五。另又向豐德麗購入亞洲電視網站五成權益，代價7052萬元，以每股作價五點五一元發行新股方式支付，共發行一千二百八十萬股新股，作價較作日收市價有溢價百分之六十五點七一。
昨日上午林百欣上班時發覺有記者追訪和守候，首先在上午十時許於其長沙灣道麗新商業中心舉行記者會，他揚言是看到報紙報道才知道，因為亞視的業務早已交由林建岳負責，他說：「（對於ATV的股權交易）我諗佢（Peter）有傾過吓，但未成熟。」
其後，他分別聯絡林建岳及其助手李寶安（MarkLee）後，再在下午記者會上轉述李安寶對他承認：「『呢件事係傾緊，但未傾實邊個係買家，未必係tom.com。』」他頗為惱怒地多次將李寶安手機號碼公開，叫記者直接打電話找李寶安查證。
林伯眉頭深鎖地說：「我早上睇完報紙打電話畀佢兩個（林建岳及李寶安），只係打通一次畀阿Mark，之後打咗十幾個電話都唔通，收尾重cut埋線。」
「後尾麗展同tom.com停牌即係事實啦，我知股價升咗，我𠵱家都蒙在鼓裏，你哋知咁多我就知咁多，Peter有意避開我，刻意迴避我，其實我都送晒（亞視股份）畀佢，佢可能驚我問佢啦。」他有點抱怨說。
他輕鬆說：「ATV啲股份一早當蝕晒，由頭到尾係Peter主意，係佢話賣，賣就由佢自己搞番，我唔理喇。」他本人或麗新有否同李嘉誠合作過？他答：「無同李生做過生意，無所謂啦，大家係朋友，又係潮州人。」
林百欣補充：「亞視我一早冇搞。至於價錢，Peter鍾意咪賣，我當冇咗；𠵱家我主要搞上海同廣州嘅地產。」