趙世光譚玉梅糾纏不清
何琍琍：做大婆要有器量

現時在上海打理飲食生意的何琍琍，前晚在上海福祿居接受本報記者訪問時，提到老公趙世光和譚玉梅交往的事件，以大婆自稱並說「做大婆要有器量」，還表示趙世光已六十三歲，有個女伴在身邊照顧亦是好事。

何琍琍投資二千萬在上海港滙廣場開設揚州菜館福祿居後，擬在當地的新天地投資鴻禧茶居及在上海城開兩至三間食店，並在江南揚州附近物色農場，提供一站式服務，實行在內地大展拳腳。何琍琍前晚在福祿居接受記者訪問，透露女兒趙式平正在法國讀飲食業課程，畢業後助她搞飲食業。

「希望做番自己」
提到日前其夫趙世光由外地回港，與紅顏知己譚玉梅前後腳在機場出現，何琍琍表示自己不太留意娛樂新聞，她笑着說：「娛樂新聞好醜陋好八卦，有啲新聞蒙上紗重好，唔知重好，我鍾意閉門造車，我只希望做番自己，將來個女身上發生同一樣嘅事，佢哋見媽咪咁堅強，可以做個榜樣來學習。」

「唔通撼頭埋牆」
至於譚玉梅和丈夫趙世光交往，何琍琍說是很自然的事，她說：「呢啲係陳年老事，我先生已經六十三歲，有個女伴陪吓佢唔好咩？做大婆嘅要有器量，唔通撼頭埋牆呀，呢啲嘢唔需要粉飾，總之清者自清，濁者自濁，我唔似啲人會講大話，我老公respect（尊重）我先會講大話，佢都係出於好心。」
問何琍琍自稱大婆，可是默認譚玉梅是二奶，她說：「唔係噃，佢只不過係女伴，佢哋有呢個名份咩？人到咗呢個地步，要自己開解自己，我都有喺我先生嘅角度睇呢件事，我唔做人嘅附屬品，唔係淨係做趙太。」

「對住老公好悶」
何琍琍表示自己未來五年都會留在上海發展，不會返港陪老公，她說：「成日對住個老公好悶，佢又唔鍾意上海，佢因為生意先間中嚟吓，正如我唔鍾意賭馬，陪佢睇一次馬都悶死我，為咗男人做自己唔鍾意嘅嘢係冇價值。」