中一派位結果噚日公布，對香港好多父母嚟講係大日子，唔少父母告假陪仔女返學校睇放榜，趙飛雲去開嗰間股票行都少咗好多師奶客，噚日港股成交唔夠50億，可能同呢個原因有些少關係。
趙飛雲有仔有女，明白父母望子成龍嘅心態，加上香港人崇尚名牌，名校僧多粥少自然爭崩頭，喺強烈競爭下，課程亦變得愈嚟愈深，曾喺電視上見過一個幼稚園名校教師，好自負咁話，佢哋學校英文程度好高，學生已經識得7種恐龍嘅英名學名。趙飛雲當時嘅感覺係香港教育已經走火入魔，遲早害死晒啲細路。其實揠苗助長嘅禍害係人都知，但偏偏香港成個教育界及家長都做緊呢件事。趙飛雲有啲朋友唔敢生仔，其中一個主要原因就係對香港教育感到絕望，既然無法改變，不如唔生，以免令下一代受苦。
讀者唔好怪趙飛雲亂噴口水，事實上噚日恒指大部份時間喺30點之內上落，好似俾人點咗穴，個市牛皮到暈，本來睇好後市嘅趙飛雲亦突然冇晒方向感，睇唔通究竟恒指係先下試10600或以下，定係先衝破萬一關。如果大市先回近10600企穩，可買些少恒指Call輪9201博反彈。
趙飛雲