迪士尼動畫新片《扮嘢小魔星》前晚舉行女童軍慈善首映禮，不少名人明星如王敏德和馬詩慧、鄧梓峰、顧紀筠等都拖男帶女捧場。王敏德提到對女兒揀男友時要求多多，十足《非常外父揀女婿》香港版。
迪士尼動畫新片《扮嘢小魔星》，前晚於灣仔會展舉行首映禮，為女童軍籌款。現場洋溢溫馨，王敏德（Michael）和馬詩慧夫婦與兩位千金、鄧梓峰和一對孖仔及大女、顧紀筠母子、傅天穎（奀妹）等都有捧場。
Michael的一對女兒曼喜和麗嘉分別九歲和六歲，兩人一向有面對鏡頭經驗，更即場大擺甫士讓記者拍照，王敏德長女王曼喜更已流露少女氣息。
問Michael可有向女兒灌輸與男仔交往的知識？他說：「有呀，但我都要佢小心識男仔，我唔畀佢咁早拍拖，最快都要五年後。如果佢識到男仔，一定要佢帶返屋企畀我見吓。最緊要個男仔有禮貌、有責任心，如果同我傾偈都唔專心，即係做事唔專一啦，我唔會畀阿女坐佢車㗎。」
擁有俊朗外表的Michael雖然本身是外籍人士，卻非常抗拒未來女婿是「鬼佬」，他說：「靚仔同鬼佬都好麻煩，我當然就例外啦。中國人最好，易相處啲。」至於教導女兒性知識，Michael則全數交給太太馬詩慧負責。
此外，同場的奀妹表示早前睇過有報道指她下圍大，令她不開心了一夜，所以決心減肥，順道為下年的寫真集做準備，她說：「我骨架大，減磅比較難，不過我都希望可以減十磅左右，我下年重會出寫真集。」
採訪：ChenMuiHeung、JessicaNgan
攝影：ChenWaiOn、LoTakKwong