陳慧珊（Flora）噚日以瘦身產品SlimPro（諾纖）嘅代言人身份，去咗金鐘港麗酒店出席記招，Flora今次以七位數字接拍廣告，經過三個禮拜試食之後，瘦咗四磅，上圍亦縮咗水少少。
噚日Flora以一件低V直身裙出現，不過唔知係件衫唔合身定係Flora上圍縮水，只見Flora好似墊咗啲嘢喺胸前，令到上圍線條更加突出。
另外，羅嘉良（撈家）近日傳婚變，宣萱更被指係第三者，身為佢哋好友嘅Flora就話：「黐線㗎，係唔係呢輪冇乜新聞呀？之前夠話我同陳豪啦，又話過我同林保怡，可能喺娛樂圈單身就多人傳，好似我離婚後都即刻俾人傳，𠵱家宣萱分咗手又俾人傳，我就覺得都唔好傳得太離譜。」
不過Flora就話近排冇見過撈家，同佢太太都唔係好熟，就算大家平時傾談都唔會講屋企事。
陳小春嘅西洋專輯《JS1&2》最近喺台灣推出，呢隻碟名嘅來源係「Jordan'sSelection」，即係陳小春精選嘅意思。陳小春話佢最鍾意R&B同hip-hop音樂，佢又話：「我欣賞P.Diddy（即珍妮花洛庇絲前男友），尤其對佢一流嘅混音功夫最佩服，我重視佢為偶像㖭。」
黃伊汶（Dior）噚日為新歌《香薰浴》拍MV，Dior要瞓喺啲冰上面拍，成個MV斷斷續續拍咗成個幾鐘。
佢話返到屋企發覺個背脊凍傷咗，所以要用暖水敷。有消息指唱片公司環球同經理人公司星皓不和，Dior覺得好唔高興。
徐子淇同鄧健泓早前去咗九龍灣德福商場出席「樂施顏色筆義賣籌款」活動，子淇話自己喺內地助養咗五個小朋友，全部都係男仔，佢話每個月只係捐少少錢，佢哋就可以有書讀，重會寄成績表畀子淇睇。子淇話班小朋友好似佢，同樣都係數學成績差啲，其他科目就比較好。
八十年代喺日本紅到香港嘅音樂組合安全地帶，解散咗十年之後，噚日喺日本舉行記者會，宣布復出。以玉置浩二為首嘅安全地帶，𠵱家正為下月七號推出嘅新碟錄音，九月會開始舉行三十五場日本全國巡迴演唱會，重會喺十月二十四同二十五日嚟香港舉行兩場騷㖭，絕對係本地安全地帶迷嘅好消息。
陳啟泰噚日喺中環出席意大利品牌Cerruti嘅宣傳，佢會獲對方贊助成一百萬嘅服飾，主持呢個月尾喺亞視復播嘅《百萬富翁》。陳啟泰話：「我得閒會做gym，呢排好似大隻咗，已經肥番十一磅，《百萬富翁》嚟緊會改喺七點半播，希望拉高收視。我遲啲重會有機會做一個外國嘅歌舞劇㖭。」
陳豪噚日接受商台《茶煲裏的查篤撑》電話訪問，講到最近俾人影到佢去陳慧珊屋企食飯嘅相，陳豪話：「我哋係好朋友，我同個個都好老友，同我做得嘢嘅都傾得埋，我個人所以冇乜仇口同敵人。」至於話佢有一位大馬女友，陳豪就話唔想乜都講晒出嚟喎！
麥紹棠嘅細仔麥浚龍日前請咗安室奈美惠嘅老公阿Sam嚟香港幫佢排舞，又同佢一齊上電視節目，經過五日嘅短暫行程，阿Sam噚日下晝就返日本，至於佢徒弟麥浚龍就冇去送機，同嚟嗰陣一大班唱片公司人員去接機嘅情況大相逕庭。