近排興起一片鬼片熱潮，特別多鬼片上映，靈異海報周街貼，膽小啲都嚇親。唔單止鬼片熱潮返咗嚟，就連驚嚇玩具都乘機大賣，其中LEGO更推出首個恐怖STUDIOS系列，幽靈、科學怪人、吸血殭屍全部出籠，等你知道積木都可以好恐怖。
記者：張穎倫
攝影：黃子偉、陳智良
ImageBoy：仇峻坊
喺一個月黑風高嘅晚上，一個瘋狂博士同埋冇腳女鬼、白衣幽靈喺佢嘅古堡兼實驗室入面，成功製造咗一個力大無窮嘅科學怪人。不幸嘅係一個西裝骨骨嘅阿John，竟然誤闖呢個既陰森又機關重重嘅恐怖古堡，究竟佢能夠逃出生天，抑或成為科學怪人嘅點心，就由你哋做導演決定。
今次LEGO推出的恐怖STUDIOS系列，並無推出拍攝鏡頭，除咗瘋狂實驗室附有CD-Rom外，如要玩拍攝效果，就要用上集侏羅紀系列推出的組件，才可自拍好戲！
當你闖入呢個滿布蝙蝠嘅地窖，你會發現地窖一邊設有樓梯、一邊裝有升降台，雖然四周都滿布火把，但都極之陰森，行近一啲會見到一個古怪僕人推住一架木頭車行嚟行去，行埋去就會見到車上裝有一副棺材。千祈唔好打開呢副棺材，因為當你一打開，長眠已久嘅吸血殭屍狄古拉伯爵就會乘機復活，隨時將你嘅鮮血吸乾吸淨！
據講每當月圓之夜，唔少偏僻村落都會有少女無故失蹤，而且每次失蹤之前村民都會聽到一陣陣令人毛骨悚然嘅狼叫。究竟失蹤事件同傳說嘅人狼有冇關係？西裝骨骨嘅阿John又可唔可以憑住佢架有型吉普車，拯救呢位少女呢？
沉睡於古埃及金字塔中嘅法老王，雖然肉身已經枯乾，但唔知係唔係因為有盜墓者嘅出現，竟令佢突然從墓中爬出來。唔單止咁，喺墓中另一邊嘅白骨精亦都有蠢蠢欲動之勢，究竟佢哋係一山不能藏二虎，定係攜手對付人類呢？
細個見到婆婆支老鼠仔酒，已嚇到目瞪口呆。若果今時今日見到呢支以骷髏頭浸成嘅拔蘭地，包保你會魂不附體。酒樽內唔單止有恐怖骷髏頭，而且更會發出詭異叫聲，再加兩眼發青光，睇見聽見都不禁令人毛骨悚然。
玩法雖然同傳統嘅泵氣玩具一樣，但一按即跳嘅再唔係可愛青蛙同馬仔，而係呢個披頭散髮嘅核突鬼頭。每按一下就會擘大口跳一跳，疏落嘅頭髮又會跟住飄起，若然夜晚見唔到有條線拖住的話，一定會畀佢嚇親。
一個漫無目的，但頭髮蓬鬆嘅骷髏頭，竟然黐住個恐怖袋不斷亂跳。最恐怖係亂跳時更會發出淒厲叫聲，雙眼又發出深深紅光，宛如地獄惡鬼纏身，真係心血少啲都俾佢嚇傻。
玩具反斗城
（27309462）
尖沙嘴海運大廈地庫032舖
Rose
（27429818）
荔枝角香港工業中心C座地下世紀廣場G室