任志剛同唐英年忽然辭任馬會董事，計埋接替周湛燊之周永健，新一屆董事會出現三個新面孔，雖然八月始正式推選另外兩位新人，但現時已暗中角力。按馬會之選舉方式，冇人「祝福」者根本冇機會。據八方所知，由邊個做差不多已定咗。
八方昨日同唐英年食晏，唐公子話馬會傳統冇公務員做董事。雖然佢唔算公務員，而且馬會除咗個獎券基金外，亦睇唔到有乜可能有利益衝突之處。不過自己係新丁局長，希望專心從政。至於任總點解辭職，唐公子就話唔知。
八方又同練馬師愛倫講起任、唐兩人離任，愛倫話對馬會是很大損失，但對特區政府則是喜訊，因為可放更多時間去服務市民。愛倫又話，任志剛和唐英年都有馬養在佢嘅馬房，兩個都好有君子風度，即使隻馬落敗亦從無投訴，是好馬主。
八方聽聞，任總會全力支持許仕仁接替佢個董事位，而唐少個位，如無意外會由鄭維志頂上。肥佬許係強積金管理局總裁，鄭係總商會主席、星洲永泰鄭家公子，兩個都夠晒班。
咁有冇人爭呢?有，其中一位有心問鼎者係冠軍集團主席簡文樂，即阿叻個姐夫，佢上周四發咗封信畀班遴選會員。表面上係講e-Gambling，約人見面，實則做乜大家都明。至於有人傳過之信和集團老細黃志祥就冇興趣爭。
傳真︰2623-9278
電郵︰