天氣悶熱，往往影響胃口，但唔食飯又冇氣力做嘢，所以呢個時候食番啲開胃餸菜，就最適合不過啦。好似今日我介紹嘅「薑芽雞卷」咁，開胃醒神兼香口㖭。正所謂「又香又脆嘅雞卷，食咗條脷唔會損」！
材料： 雞髀肉切片十二片（份量可按個人喜好決定）、子薑十二片、金華火腿（切條）十二條、西芹（切條）十二條、沙律醬半碗、葱一棵、甘筍半個、雞蛋一隻、生粉一小碟、生油適量。
製法： 首先將雞蛋攪勻，每塊雞片卷住一火腿條同西芹條，然後用雞蛋黏住封口，包好之後再將雞卷沾上生粉，放入滾油裏炸，待油再滾起，可以熄火繼續炸啲雞卷，事關雞片好容易熟，熄火去炸就唔會炸燶，炸好之後將雞卷撈起備用。將葱切絲，及將甘筍切花，落少許油炒一炒啲葱同甘筍，然後再落雞卷同半碗沙律醬，炒一至兩分鐘之後就可以上碟，最後將子薑鋪上面就完成。
（五之四）
口述：陳松伶
筆錄：戴彩煥
攝影：仇志德
顧問：楊貫一