蔣震位千金蔣麗莉五月初生咗個女，咁啱蔣震噚日出席自己公司震雄的業績記者會，八方趁機問吓外公，個孫女得唔得意。點知呢個「大頭蝦」外公，竟然唔知自己個外孫女叫乜名，話改名係爺爺的責任，所以自己唔知道，不過就肥肥白白，同哥哥好似樣，一睇就知係兩兄妹。
八方轉頭走去問蔣麗莉個細妹兼震雄未來「揸fit人」蔣麗婉，點知麗婉都要問人至記得，原來BB女的英文名叫Gily，即是爸爸Gino同媽媽Lily的混合體。又難怪嘅，蔣震有七個仔女十八個孫，一時間真係好難記得晒。
講開又講，年屆七十九歲的蔣震話，已計劃好明年八十歲便退休，退休之後第一件事是要到華山遊覽，公司就交由麗婉打理，但麗婉即刻補飛，話爸爸將來仍是公司主席兼技術顧問。
傳真︰2623-9278
電郵︰