美國再傳出第2大藥廠Merck「作大」營業額，令噚日標普期指大幅下挫逾10點，港股亦轉升為跌，因為投資者認為美股噚晚必挫無疑，搞到大戶連盈富（2800）都冇心機認購。
不過ｉ師傅認為，今次Merck將一啲冇收取嘅收入入帳谷大營業額，咁嘅入帳方式雖然有問題，但唔算「死罪」，因為對公司盈利冇影響，而邊際利潤則會減少，情況就近似某啲貿易公司咁，做代客採購生意，所有採購額都會入帳，成為營業額，但同時採購成本亦會入帳，故此盈利唔受影響，而邊際利潤就保持在2-3%水平。當市場發覺呢單case可能只係虛驚一場時，港股表現可能會唔同晒。
國內電力股噚日基本上都企穩，不過山東國電（1071）就斯人獨憔悴，全日跌4.76％，收報2元，成交金額達1.2億元。最近管理層向證券界透露，上半年燃煤成本意外咁上升20％，令不少大行調低佢嘅盈利預測。上周已有基金開始換馬，噚日更有基金洗倉迹象，股價短期有壓力。
中銀香港（2388）禮拜日公布招股詳情，阿虎以為中銀噚日就即刻接受認購申請，所以一早起身去攞申請表，諗住咪執輸，點知原來中銀下周一至正式接受認購，如果係咁，使乜咁早舉行記者會講招股詳情呢？黑客話，中銀驚住散戶資金走晒去認購長江生命科技（8222），一旦認購資金鎖住，未能及時回流至散戶手上，中銀招股成績就肯定受到影響，所以提早對散戶打招呼，下個禮拜有平貨執，提醒大家唔好瞓身落長科。
阿 虎