早前被人踢爆去嫖妓嘅祖雲達斯後衞祖利安奴，話自己根本唔知嗰間裝修成美容院嘅地方，原來係個淫窟。之但係，祖利安奴年紀都唔細啦，有冇可能分唔到乜嘢係美容院，乜嘢係妓院呀？
祖利安奴同埋其他六位現役嘅意甲聯球員，上個禮拜俾人踢爆係一間地下妓院嘅常客。而祖利安奴喺日前，就為呢單嘢進行解釋，話自己唔知間美容院其實係妓院，重話去嗰度純粹揼骨，以消除一吓比賽後嘅疲勞，冇做過任何不道德嘅嘢。
不過，我求大俠就覺佢嘅理由有啲牽強，事關佢今年都成二十八歲，冇理由連啲簡單嘅嘢都分辨唔到。所謂愈描愈黑，就係佢呢種；佢咁樣講，咪盞俾人覺得佢身有屎。
雖然嫖妓喺意大利唔係犯法，但係祖利安奴佢哋身為公眾人物，行為就應該檢點啲，𠵱家啲傳媒咁鍾意挖人哋臭史，佢哋有乜嘢行差踏錯，到頭來蝕底嘅只會係佢哋自己。
兜兜轉轉，終於由雲拿保斯坐上咗列斯個龍頭位，我求大俠一方面恭喜呢位前國家隊領隊之餘，另一方面亦替佢擔心，記得早幾年英格蘭訪港就係雲拿保斯帶隊，結果就傳出唔少球員紀律欠佳嘅醜聞。而列斯嗰班生牯仔一向出名惡教，唔知雲拿保斯搞唔搞得掂呢？
烏克蘭快馬舒夫真高，上季好似死晒火咁無乜料到，都係因為長期受到傷患困擾至搞成咁，所以呢位AC米蘭射手日前就話𠵱家乜都唔望唔諗，最緊要係身體健康唔好再傷。我求大俠就覺得佢都算識諗嘅，不過會唔會因為怕咗受傷，而唔敢去得太盡，踢唔番當「弗」時嘅水準㗎？
到目前為止，今季一級方程式賽車鬥咗十個站，舒密加就攞咗七站冠軍，唔怪得之前車手希爾話𠵱家啲比賽真係悶到七彩啦！我求大俠就希望莫托亞同拉夫舒密加呢批後起之秀爭氣啲，可以喺賽車場鍊贏舒密加，事關如果場場賽事都係一面倒，好冇癮啫！
先後喺法國公開賽同溫布頓公開賽女單決賽，輸畀妹妹莎蓮娜嘅威廉絲，唔知係咪輸到儍咗，竟然話莎蓮娜再係咁勁嘅話，佢就轉行唔打網球。我求大俠聽到之後真係得啖笑，事關比賽嘅嘢唔係贏就輸，使唔使咁認真呀！況且打網球咁好搵，我求大俠點都唔信佢老竇李察畀佢轉行。