老公話呢排食得荔枝多，搞到有啲濕熱。我即刻煲啲五花茶過佢下火，點知奄尖嘅佢竟然話飲到悶。喺我搜羅有乜新清熱食品之際，俾我發現到呢款新鮮紫背天葵，聽阿媽話紫背天葵清熱解毒功效佳，不過平時較少機會搵到呢啲新鮮貨，家陣可以喺超市搵到，當然第一時間入定多幾包貨。
我都係首次飲佢，煲過水後嘅紫背天葵即呈現深紫色，名副其實係紫色，唔小心俾啲汁滴落衫上都幾難洗㗎！一包約半磅重，除咗煲涼茶外，亦可配以蒜茸炒，滑溜質感有啲似潺菜。
$10.8包 崇光Freshmart有售
中式調味料好多選擇，但包裝通常都好平實。外國香料就好多都會包裝得好精緻，所以我有時見到都會忍唔住買返屋企，唔止有香料用，重多咗個靚樽。
好似呢隻意大利香料，係混合香草，可以炒意粉或做意粉醬汁，但最吸引嘅係佢個陶瓷樽，真係好鬼靚好吸引，所以我都買咗個返屋企。
$62樽 city'super有售
夏天悶悶熱熱，比較鍾意食爽口嘅食物，咁啱行過凍肉舖時見到有去骨鴨掌賣，就買盒返屋企。原來呢種鴨掌已經係半加工過嘅食品，經過漂白同汆水，而且已經去骨，所以煮時慳咗唔少工夫。加蠔油汁去燜一燜再攤凍，就已經可以當冷盤食。
$24磅 各大凍肉舖有售
文：肥師奶