就快改名做上海世紀控股嘅四海互聯網（755）終於開車，噚日升6.84％，收39仙，成交金額有成2000萬銀。睇個勢隻股重係剛剛開始，應該重有上車機會。
四海互聯網喺5月份，以每股0.32元，配售3.5億股新股，集資1.12億元。大部份貨源落在上海幫手上，所以成個6月份，當二三線股仔玩緊大逃亡時，四海互聯網仍守住35仙水平。
經紀陳話，或者係睇完世界盃，炒家有時間做嘢，四海互聯網上周五尾段已經蠢蠢欲動，噚日就特別明顯，睇番成交量同埋股價，配售嗰3.5億股新股，睇怕冇咁快散得晒，應該重有得去，不過上車者要自己執生。
公司早排話過再發展上海房地產市場，但究竟呢瓣生意有幾正？小初就唔識睇，只係知道好多有上海幫背景嘅股仔都喜歡搞呢門生意。
慕容小初