日股先升後跌，亞洲區標普期指又跌，午後歐股開市又跌，港股好友結果空歡喜一場，恒指微跌2點，仍守穩10800。
九倉（004）企定喺18.50元，冇升跌。九倉由基金打骰，走勢唔係跟足大市，好有「個性」。個市滯滯哋之時，九倉通常都叻啲；個市升得急嗰陣，則又較落後。大市暫時反覆，九倉有機會跑贏大市，可以細細注揀啲九倉Call輪揸吓。
九倉Call輪9208同9149比較諗得過。9208今年12月到期，現價30仙，溢價1.5%，槓桿率6.2倍，數據唔錯。9149現價20.1仙，溢價亦係1.5%，槓桿率去到9.2倍，1個月後夠鐘。想穩陣，揀9208，想搏殺啲則揀9149。
中銀香港招股，招股價範圍訂出，恒生（011）同東亞（023）分別下跌1元同25仙。兩者都係做本港銀行生意為主，業務同中銀相同。
中銀實際招股價有可能訂喺指標範圍內較高水位，恒生同東亞若然再跌啲，收集恒生Call輪9143同東亞Call輪9116。
章 盛