大市噚日高開低收，基金同大行冇搶貨，散戶亦出奇地冷靜，恒指一度升過130點後就回軟，午後更一度倒跌近40點，收市10803，跌2點，成交又縮，只得61億元，咁嘅動力，短期都好難大升。期指收10844，高水41點。美企又有假帳醜聞，市場憂慮美股又會再跌過。
坦白講，𠵱家唔係好多人有信心入市，大市由低位10291升番上嚟，有人睇係反彈，亦有人睇係新升浪開始，暫時仍係睇淡者佔大多數，除非大市衝破11100嘅重要阻力位，市場氣氛才會改觀。
噚日下跌股比上升股多成百隻（不計認股證），而呆定嘅更有300多隻，今個月有長科（8222）同中銀（2388）招股，搶走唔少頭寸，入市資金暫時會變得疏落。逆市而升股票中，有大成交支持的，以第一龍浩（875）較為突出，高收18.2仙，升1.4仙，升幅8.3%，成交9300萬股。本欄早幾日推介時股價為14.6仙，現時升幅已達25%。
龍浩剛宣布與中國治沙學會合作，共同促進及推動中國防沙治沙業的發展，國家目前投放於防沙及防護林工程的費用，每年高達90億元人民幣，呢個大餅，分一小塊都不得了。龍浩長線值得憧憬，但短線升幅已大，有機會出現調整，可先獲利，待整固後再低吸。
另一隻升幅較大的冷門股，係剛宣布業績的新興光學（125），股價一度高成2.65元，收2.55元，升0.3元，升幅13.3%，成交只67.8萬股。
2002年度（3月底止），新興營業額同盈利分別有7%及8%增長，表現理想，往績PE6.4倍，息率4.2厘。現年度頭兩個月，營業額比前同期激增40%，集團預計在經過上年度的緩慢增長後，現年度會有更好表現。新興經營作風穩健，中線持有獲利機會大，建議候其調整時在2.2元吸入，目標價2.8元，止蝕2.0元。
郭兆誠