新地珀麗灣上個禮拜由地產代理發起海陸空巡禮之後，今個禮拜進入主題。新地噚日同各代理行開會，講解前往現埸嘅交通安排，發展商提供6條巴士線，同兩條小輪線接載市民睇樓。由於新地係九巴大股東，相信係九巴幫手。
地產代理本身有好多專巴接載客人參觀示範單位，但今次就一概拒絕「入境」，代理想用專車接載客人，就要同新地租車。新地重要代理行今個禮拜五回覆想租幾多部專車，不過，車租點收法就未有定案。點解一定要向新地租專車，據講有人解釋係因為新地嘅司機受過訓練，專業啲，咁都係理由？睇嚟新地今次都可以賺番地產代理一筆。兩條小輪會設喺中環4號碼頭同深井馬灣碼頭。
新鴻基地產想喺上海金融區興建一座地標商廈，用來省靚招牌，聽講新地同陸家嘴金融貿易區開發股份公司傾緊外灘「陸家嘴世界美食城」塊地，雖然重未聽到有乜實料，但蘭西就八到啲小道消息。
話說美食城塊地一早就預咗大搞，做美食城只係臨時性質。不過，美食城內食肆不乏豪裝，至豪嘅首推小南國嘅法式風情，點解咁落本搞到有咁豪得咁豪？原來陸家嘴公司為咗吸引商戶開業，同啲商戶簽約時，講明日後搬遷，會賠番雙倍裝修費，換言之，裝修費愈高，賠得愈多。呢個消息是否真確，蘭西就未敢百分百肯定，但若然屬實，裝修成本唔知會唔會計埋落地價呢？
時興搵獨家代理，恒基地產起步雖然慢啲，但就好積極，佢哋今日又有兩個貨尾盤委託代理獨家銷售，一個係西半山英華閣，另一個係筲箕灣麗東海景豪苑。其中麗東海景豪苑重整咗個頂樓複式示範單位。兩家公司今日舉行委託簽約儀式，恒基營業部總經理張炳強同中原施永青都會出席。
中原上個月已經攞到恒基荃灣芙蓉雅苑獨家代理權，𠵱家又多兩個盤。近年比較少曝光嘅施老闆，可能有見樓市形勢改變，以一手做主導，為咗生意要多啲現身，同發展商打好關係，等啲獨家代理盤可以源源不絕，實行「密食當三番」。
另外，恒基大角嘴港灣豪庭貨尾，就由鴻運地產攞到3個星期的獨家代理權。
蘭茜昨日講過內地樓盤旺，但一位在內地搞樓盤的老友話，咪睇內地樓盤𠵱家咁旺，其實搞內地盤相當考功夫，涉及法律問題複雜，搞不好更有好長手尾。老友收到風，一間老牌地產上市公司便有麻煩，佢嗰項目的中方夥伴，今日會開記者會大數對方不是。
基於法律問題，蘭茜姑且叫間公司做K。以前K公司在香港有大批地皮，有上市，係大價股，七八十年代同大集團合作起樓賺大錢，然後舊股東將股權賣埋畀人，公司個殼落入金融奇才之手，奇才繼續搞地產，重同L君間寶號合作做內地地產生意，其中一個盤喺武漢，點知出了事，其中方夥伴更要告K。
經過多年官司後，內地法院判中方夥伴勝訴，而內地官司判決後，中方要申請香港法院執行判決，可是中方夥伴話K及L在香港耍手段，因此要爆大鑊。由此可見大集團搞內地項目也有嚴重手尾，何況其他人。
利記中西半山分區經理王靜強，為咗鼓勵下屬努力搵生意，搞咗個比賽，請上半年做數最多嘅代理，去東南亞旅遊，結果由般咸道分行客戶經理黃裕球贏出，佢為公司帶來56萬收入，而黃裕球重被擢升為高級客戶經理，真係雙喜臨門。各代理以後要醒啲嘞，老細分分鐘借比賽為名，順便考察大家表現。
蘭西
電郵地址：