八十七歲的李定好婆婆，患有腎衰竭，月前不幸再因腦血管閉塞入院，其居於內地的孻子阿明，遂申請雙程證來港守候母親身旁。然而，阿明來港個多月，身上的盤川經已耗盡，憂心戚戚的他，不知如何是好，禁不住灑下男兒淚。
記者日前陪同阿明前往醫院探望李婆婆，插着胃喉的她，神志有點迷糊，但其間卻一直緊緊握着兒子的手。「媽媽，你今日點呀，有冇好啲？你見攰就瞓吓啦，我會喺度陪你㗎。」阿明倚在母親床邊輕聲的說。
本身為香港居民的李婆婆，自從老伴兩年前因肺癌病逝後，在港孤苦無依的她，便返回內地與兒子同住。直至上月，李婆婆不幸出現急性腦血管閉塞，半邊身癱瘓，阿明遂急送她返港就醫。「媽媽嘅病起得好急，我都唔知佢咁嚴重，𠵱家醫生話佢嘅情況隨時都有變，我真係好擔心。」
四十六歲的阿明，一臉憔悴，瘦得兩頰凹陷，侍母至孝的他，兩年來為了照顧母親，確實付出了不少心血，但阿明依然無怨無悔。「爸爸好早就嚟咗香港搵食，兩個姐姐又結咗婚有自己家室，好多時都係我同媽媽相依為命，所以我哋兩母子感情好深厚，𠵱家佢年紀大有事，唔通我丟低佢唔理咩。」
刻下的阿明，只想一盡兒子的責任，陪伴母親走畢人生的最後一段路，惜一貧如洗的他，實在無法再維持在港的生活費，為此愁煩不已。「我只係帶咗一千元嚟香港，連租地方落腳嘅錢都冇，好彩媽媽啲舊街坊可憐我，借咗間吉屋畀我住，但香港消費咁高，一日兩餐同搭車去醫院探媽媽，每日最少都要用四十元，𠵱家我身上已經冇晒錢，呢幾日都係靠問街坊賒借。」
事實上，在內地任職廚師的阿明，近年也面對開工不足的困擾，令他收入銳減，兩母子每月只能靠數百元人民幣維生，加上李婆婆身體欠佳，經常要入院接受治療，為了籌措醫藥費，阿明早已債台高築，經濟十分拮据。紅着淚眼的阿明慨歎：「一世人只得一個媽媽，我只係想陪得佢一日得一日，但𠵱家咁嘅情況，都唔知點算。」
蘋果日報慈善基金了解到阿明的苦況，即時撥款三千元，助他應付短暫生活費。 捐款編號：C0619
暖流熱線
電話:29908688
傳真:23702192
電郵:
網址：