昨日一早到股票行，期指裂口高見10980，但走勢冇預計咁強。
恒指高開117點，早段喺10880至10920窄幅爭持，趙飛雲於0.105元買入50萬份恒指Call輪9201，但買入冇耐，期指就跌穿開市初段低位10885，屬即市利淡訊號，其後3度反彈，上試10885阻力均受阻而回，偏淡訊號更明顯，趙飛雲心暗覺不妙，但恒指輪9021仍企於之前低位0.101元之上，難免心存僥倖，希望午市港股有轉機，但午市又傳出有美國公司會計帳目有問題，港股進一步轉弱，恒指輪9201跌穿0.101元支持，惟有先止蝕，喺0.099元沽出計數。
港股試闖萬一關，臨門撻Q。呢幾日真係俾美股玩到氹氹轉，雖然恒指僅跌2點，不過已經打窒好友條氣，市場情緒冇咁樂觀。
新地（016）噚日受制於50日線63.50元，最後跌0.25元，收62元。估計短期會於60至63元範圍內整固，所以繼續持有。此外，如果見跌近60元守得穩，可以撈番新地輪9371博反彈。
趙飛雲