這次介紹的特許經營時裝店不像一般加盟店，全由總公司代辦牌照，而是需要經營者自己辦理，很考個人眼光、耐力及談判能力。需要的資金不多，約二十四萬便可以了。如果自問有能力、有時裝觸覺的朋友，不妨參考Peter的經驗，看看自己有沒有上內地一手一腳創業的條件。
記者：羅蘭 攝影：陳星
本身在港經營時裝店達六年的Peter，剛在深圳東門附近的中興路開設了一間特許經營時裝店Touch，聽他說Touch雖然在港只得兩間，但在大陸早已開了七十多間，分店遍布廣州、上海、珠海、東莞等地。
「其實Touch喺大陸開咗十年，算係中高檔品牌。而96年我自己亦喺香港金百利商場搞歐洲時裝，開始時利潤都算唔錯，可以係入貨價嘅兩至三倍，但後來因為經濟愈來愈差，近年利潤只降到得1.5倍，扣除成本就所剩無幾。咁啱我有朋友喺大陸做開時裝生意，佢話𠵱家內地人嘅消費力比香港人高，重介紹我做Touch㖭，於是我咪上嚟試吓囉。」
Peter認為在內地做生意，有很多陷阱要提防，其中選址和租約就最值得注意。「國內租約好多時係國內人自己寫出嚟，所有條件都係保障佢哋，所以一定要睇清楚，如有需要最好補充一些保障自己嘅條文，但我建議最好喺當地請律師代辦，花幾千蚊好過你慳少少，到頭來重蝕得緊要。」
Peter之所以咁語重心長要香港人睇清楚租約，正因他是過來人，差點被騙。「我貪呢條中興路人流多，東門就喺後面，隔籬又係連謝霆鋒都上嚟剪綵嘅紅館Disco，都算幾旺但租金唔太貴。於是我就同業主傾，佢話要我畀三萬蚊頂手費，但後來先知佢只係二房東租上租，我咪要佢搵埋業主出嚟見面囉。初時佢應承我可以拆咗舖內嘅一幅牆，點知業主堅持唔畀，話嗰幅係主力牆，佢一家大細就住喺個舖樓上。我見都洗濕個頭，惟有照租。個業主重話如果我早啲搵佢，我就唔需要畀貴啲租金。」
加盟Touch，經營者要自己辦理所有牌照；此外，若是售賣的貨品滯銷，而加盟商又一次過入了60件以上，一個月內可退還10%。
「因為我唔熟悉深圳嘅法例，所以惟有搵個信得過嘅親戚做拍檔，靠佢幫我辦理所有牌照。而總公司就會幫我搵師傅裝修，照住佢哋嘅設計圖樣做，所以我都會睇實師傅做嘅每一個地方。成間舖可以話係我一手一腳建立，就算係一把間尺，我都要自己買，因為啲Sales買番嚟嘅總係唔啱心水。」
講起員工，Peter話佢請番嚟嘅全部都好乖好聽話。「可能我請慣人，一眼就睇得出邊個乖邊個醒目，大陸女仔唔似香港女仔咁識做戲，佢哋比較真。我無特別登廣告請人，只係喺舖頭外面貼街招，一日就有十幾個人嚟見工。我亦唔會好似其他公司咁要收佢哋押金，我好尊重佢哋。
「但佢哋就一定要準時返工，如果要加班，我亦會畀加班費佢哋，令佢哋覺得係同大公司打工，而且我會以香港嗰套教佢哋去招呼客人，要佢哋盡量跟客人熟絡。」
到Touch買衫的客人，主要都是中產的家庭主婦同OL，間中亦有做娛樂事業的女性，因為Touch售賣的時裝種類，可以分優閒、上班和晚裝三類。「呢度嘅衫由百幾蚊至四百幾蚊都有，價錢屬中上，重有手袋同皮鞋，種類都算齊全。不過呢度買嘢嘅人好興講價，但我一定唔會減，要明碼實價，否則，我同街邊舖猛叫客返嚟嗰啲有乜分別？我要佢哋知道喺我呢度買衫，係合理價錢，高質素服務。」
為咗吸引顧客，Peter一開業便實行減價，希望從中儲到一班熟客，等換季時可以有爆炸性的營業額，他還預計8個月後應該可以賺回成本，向內地創業的道路邁進一大步。
1.消防檢驗證
2.工商證
3.稅務登記
（以上費用共不超過?200，需時約三至四星期）
4.衞生部清潔費?50
參考網址
聯絡我們
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。