近年香港賣樓花樣多多，內地都有樣學樣，例如新盤如雨後春筍嘅深圳，除咗將個售樓處整到靚一靚外，搞抽獎亦好流行，形式簡單直接，即場落訂金，就可以在美少女售樓員陪同下，轉幸運輪攞獎，全部都係國產家庭電器，永不落空。
話時話，內地賣樓員工服務態度真係愈嚟愈好，人未行到售樓處門口，已經有一大班年輕售樓員從內跑出，打完招呼再恭恭敬敬咁引領你去睇樓，沿途不停聽到「歡迎參觀！」睇完樓決定買都覺得值啲。
同內地售樓員閒談，佢哋話香港人買樓買得好爽快，唔似得內地人會長時間考慮，不過，內地客豪起上嚟都好緊要，有位潮州廠家，睇完樓決定買，轉頭去自己架車個車尾箱捧出一大袋人民幣，數咗幾十萬出嚟一次過畀晒錢，認真豪氣。
和黃上個禮拜六在港開賣深圳黃埔雅苑三期，蘭西噚日去紅磡黃埔號售樓處睇過，現場氣氛重熱鬧過賣香港樓。有睇樓市民關心單位有冇裝修，一問之下，先知只係廚廁有裝修，其他係「清水樓」，即冇裝修咁解。
由發展商操刀嘅廚厠，用到黑金沙麻石做檯面，價錢同頂級雲石一樣咁貴架。
售樓處擺放咗3個單位模型，最吸引都算係頂層複式連天台，面積3469呎，有7間房，客廳有兩層高落地大玻璃，夠晒豪氣，天台重有私家泳池。有位內地客在深圳春交會時已訂咗一間，至最近小超出價500萬，二話不說即扑鎚。黃埔雅苑只係第三期先有複式連天台泳池單位，全部得8個。
暑假係零售業黃金檔期，各大發展商都造勢，搞旺個場，恒基將軍澳新都城中心商場，就用咗300萬搞「反斗奇兵嘉年華」活動，設「反斗奇兵樂園」，包括巨型模型同紀念品攤位。迪士尼「反斗奇兵」主角胡迪同巴斯光年重會由美國嚟港，響7月中到8月中同大家見面。另外，發展商又請到郭富城、盧巧音同陳冠希等做宣傳。
響7月28號上晝11點到中午1點，買咗地鐵慈善票嘅市民，可以響藍田搭鐵去新都城（寶琳站）睇「反斗奇兵嘉年華」開幕禮，重可體驗吓8月18號通車嘅將軍澳線。地鐵所得善款就捐畀公益金。
香港經紀帶客睇樓，荷包都要放多啲錢至得，帶定一、二千銀就差唔多，此話何解？話說有次蘭西同經紀去沙田參觀新樓欣廷軒，行到去停車場大閘，經紀除咗慣常簽名留低卡片外，竟然重要擺低二百銀。經紀邊行邊解釋，話欣廷軒管理處要求經紀帶客睇樓，要按人頭收取一百蚊按金，睇完攞番。今次兩個人就收二百，遇着帶住一大班人，隨時要袋住成千銀先有得入去。曾經有行家帶唔夠錢，搞到要急call阿頭救援。同管理處傾過，佢哋咁做係保障業主單位，或公眾地方一旦受破壞可以有得追。經紀又話，業主覺得呢個處理手法好好，而睇樓人士就稍嫌麻煩。
雖則話個市麻麻，但間唔中都會有啲令人意外嘅成交個案出現，今次又輪到首置客威，早幾日沙田世界花園百合閣中層C單位，1445方呎，由年輕首置客以301萬元購入，每呎2083元，美聯鄧天勇話，今次個價重返10年前水平，絕對震撼。世界花園單位面積由1025到2500方呎，乃正宗老牌豪宅，以前住咗唔少娛樂圈名人，連歌神許冠傑都曾經係業主。個首置客買嘅係3房連套房，呂字形廳，有露台，第一次買樓就住得咁豪咁闊落，將來點換樓？
上個禮拜五長江生命科技派發招股書，如Tom.com般萬人空巷的場面雖不復見，但亦不乏忠實擁躉。噚日蘭西係尖沙嘴港景峯示範單位，聽長實營業部經理郭子威講，有部份客見港景峯發展商係長實，以為有得攞招股書，搞到職員要同佢地解釋一大輪。蘭西諗，其實長實可以順勢喺示範單位派招股書，話唔定會增加樓盤參觀人次！