趙飛雲對美股上周五走勢相當意外，雖然當日亞洲市時段，外圍標普期指升約15點（杜指約150點），但鑑於之前市場預期美國就業數據過於樂觀，當晚公布實際數字估計低於市場預期，將對美股有壓力，這亦係上周五趙飛雲作出穩健部署沽新地窩輪9371，改買正股嘅原因。
有時真係聰明反被聰明誤，6月份美國新增職位果然只有36000個，遠較市場預期75000個為低，但美股竟然全面勁升，杜指及標普500升3.6%，納指更升5%，連歐洲主要股市亦全面大升3-5%，「五窮六絕七翻身」似乎應驗於全球股市。
其實美股升得唔尋常，媒體分析嘅原因唔係好有說服力，睇番杜指及納指走勢，高開後節節上升，基本上冇回頭，以全日高位收市，以挾倉嘅勁度嚟睇，十足似有恐怖分子之前做咗淡倉，畀美國政府狂挾咁款。
港股今日大多數以裂口高開，對於未上車嘅投資者確係痛苦，而對於持貨過低嘅基金經理更係大災難，因此除非美股今晚又戲劇性大跌，否則升浪一旦啟動，唔容易立時收掣，趙飛雲校定鬧鐘早起，伺機追番啲恒指Call輪9201。
趙飛雲