所謂一沉百踩，好似英國網球手漢文咁，原本俾傳媒捧咗上天，點知咁不幸喺溫布頓男單四強出局，重俾人踩到一蚊都唔值。
賽前啲英國人對漢文寄予厚望，認為佢好有機會繼一九三六年嘅佩利後，成為首個贏得溫布頓男單嘅英國人。但係好唔好彩，漢文又喺（五年內第四次）四強講拜拜，於是乎啲傳媒亦即刻變臉，話佢技術水皮同埋係失敗者。
講真呀，我求大俠都好戥漢文唔抵，事關佢份人都好低調，唔會周圍認叻，只不過係啲傳媒捧得佢太高。𠵱家佢再一次喺同胞面前失威，其實經已好慘，啲傳媒重咁樣嚟奚落佢，似乎有啲過份。
意大利前鋒馬卡朗尼話佢之所以加盟米杜士堡，只想為日後轉投曼聯鋪路。佢份人咁直腸直肚，真係幾值得人欣賞，但係就可能會引起米杜士堡球迷反感，令自己處於一個不利位置。事關佢擺明當米杜士堡係踏腳石，若然佢下屆冇表現嘅話，睇怕有排佢受。
英超聯升班馬曼城雖然係多國部隊，但領隊基瑾就唔擔心球員喺溝通上出現問題，原因係好似丹麥龍門舒米高、喀麥隆後衞麥度莫、喀麥隆中場科爾同法國前鋒安歷卡咁，啲英文都幾掂。咁樣睇嚟，如果孫繼海唔練好啲英文，睇嚟真係唔使旨意有機會落場比賽。
意大利足總計劃畀女球證吹新一季意甲聯嘅比賽，唔知國際足協有冇打算又咁做呢？女人比男人細心，可以留意到啲細微嘅嘢，咁啲爭議事件就會減少；重有，話晒男女有別，啲球員拗起上嚟，起碼唔會同女球證動粗先啦。啲球證喺今屆世界盃問題多多，係時候改變一吓。
因犯錯而導致英格蘭喺今屆世界盃八強輸畀巴西嘅門將施文，諗住用釣魚嚟忘記傷痛。之但係，唔好話我求大俠唔提醒佢，佢老人家上屆就係為咗釣條大魚，搞到整親個膊頭，唞咗幾個月先可以復出比賽。你知啦，佢九月就三十九歲，如果再整親，睇嚟真係可以退休。