容祖兒繼早前~H2O+新廣告及新碟封面以性感姿態示人後，前晚她為陳奕迅演唱會任嘉賓時，又不慎酥胸半露，盡顯成熟女人味。Joey坦言近日胸部變得有睇頭，令她自己也嚇了一跳。
現年二十二歲的容祖兒（Joey）愈來愈有女人味，早前她為~H2O+拍攝新一輯廣告及其新碟封面中，都是以成熟性感造型亮相。
前晚Joey到會展出席「Eason&Friends演唱會」時，雖然她只是穿了白背心配牛仔褲，但舉手投足間盡顯女性美，而Joey俯身時更春光乍洩，性感非常，她自己亦坦承近日身材變得甚有睇頭。
陳奕迅（Eason）前晚在會展舉行「Eason&Friends演唱會」，容祖兒、周英杰、Twins齊齊擔任表演嘉賓，而Eason父親陳裘大、Joey母親及蔡卓妍母親都有捧場。前晚Joey身穿白色背心，當她俯身取東西時，不慎春光乍洩，騷胸半露。事後Joey說：「早排我同舊同學食飯，佢哋都話我女人咗，以前A字膊，乜都冇㗎嘛。」
談到Joey胸部似乎較前有睇頭，Joey也承認說：「係囉，之前廣告張相影到我咁大，睇到我都心慌慌呀。」問Joey今後會否轉走性感路線？她說：「唔會啦，我本身低能，都唔夾性感，除非廣告要啦，平時就唔會。」
而Joey前晚獻唱時因無線咪失靈，令她甩嘴兼走音，但換過咪後Joey竟一樣走音兼甩嘴。演出期間Joey的上衣又突然甩珠片，她即說：「我整爛件衫呀，賠番件衫畀我，我阿媽整畀我㗎。」
事後提到唱歌失準時，Joey即垂頭黑面說：「我唔舒服，胃痛呀，醫生有開藥畀我，我唔想食。我今日畀自己零分。」
提到有雜誌指Joey將其母當妹仔用，Joey生氣地說：「我媽咪唔會為報道唔開心，佢一樣咁錫我。我有時係幾頂心，但阿媽眼中我都係乖嘅。」
此外，Eason透露日前拍攝電影《賤精先生》一場火燭戲時，不慎被火燒頭髮，事後Eason頭髮剪短，腦後明顯有紅印。談到有傳謝霆鋒為避張栢芝更改電話號碼，Eason表示不清楚，平時他只致電霆鋒助手。
而Eason父親陳裘大前晚被問到涉嫌貪污的官司時，他只說：「唔好講呢啲，我唔煩，不知幾開心，都過晒啦！」對於父親官司，Eason說：「你哋清楚過我。」
採訪：馮美茵
攝影：林德雄