何韻詩、Shine、九人女子組合Cookies、張鎧潼同EO2等，前晚去咗海洋公園出席新城搞嘅「HipHop香港幫舞林挑戰大會」活動。
Shine成員徐天佑話佢喺上周五因為鼻竇炎開刀做手術而入醫院，之後就出院工作，點知做做吓嘢，佢打乞嚏時竟然噴咗啲血出嚟，佢話可能係鼻膜損咗喎，之後重搞到影響咗錄音嘅進度，而原本喺暑假推出嘅大碟，𠵱家要九月先出到。
而Shine今日同港姐出發去塞班島拍外景，本來係安排方力申去，但方力申度唔到期，今次執二攤，Shine就話唔介意。問佢哋怕唔怕同港姐傳緋聞，佢兩個嚇到彈起，重話：「唔會喇，我哋咁細個。」
九人女子組合Cookies前晚只出現六位成員，其中三位出埠工作，成員之一Serena隻手瘀晒，佢話近排唔夠瞓，於是去刮痧，點知隻手瘀晒之餘重感冒㖭。
黃卓玲噚日去銅鑼灣怡東酒店，出席佢任代言人嘅歐亞美容院美容講座，佢話今年係第二年擔任代言人，酬勞都好滿意。黃卓玲噚日着咗條低胸裙出席，早前佢身體出現嘅水腫情況似乎冇咁嚴重，至於目前嘅身體狀況，佢話有進步，起碼好番六、七成，而停經嘅情況亦已有改善，不過佢希望身體可以盡快康復，而下個月會復工為無綫拍劇集。
梅小惠、鄧兆尊、黃智賢同朱凱婷前晚到電視城錄影《一觸即發》，梅小惠起初唔敢試跌入個窿，但話佢知錄影時如果輸咗佢就一定要跌，梅小惠又話冇所謂。點知到真係錄影時，佢真係輸咗跌咗落個窿度，重一邊跌一邊叫到鬼殺咁嘈，黃子華都話俾佢嚇到雙耳唔舒服，連收音嘅同事都話小惠嗌爆咗支咪喎，小惠就只係講句：「唔好意思。」
馬浚偉噚日喺馬鞍山拍攝無綫劇集《帝女花》，劇情講話飾演周世顯嘅馬浚偉攻打清兵，為咗做出泥濘一片嘅場境，水車要不停灑水，搞到馬浚偉全身濕透。拍攝完後佢講笑話：「濕重好啦，可以降吓溫，冇咁熱，不過拍呢套劇都可算係最辛苦嘅一套。」
王喜噚日去咗西九龍中心出席一個車展，佢嘅忠心fans特登去搵佢，個fans一見到王喜就好開心咁走去搭佢膊頭傾偈，又猛咁搖王喜隻手。兩個傾咗一陣，個fans竟然埋怨王喜唔錫佢喎，搞到王喜發脾氣咁話：「你畀我做嘢啦，夠啦，你上次都見晒報，我受夠，我都係人嚟㗎。」同場嘅錢小豪就話佢十月會做第二任老竇，佢太太做咗掃描，今次係生仔。
王傑噚日為2002年全球華人新秀大賽，喺尖沙嘴美麗華酒店舉行嘅坐談會做講師，王傑重即場教人練聲，王傑話佢近年把聲都唔係幾好，睇過好多喉科醫生都唔得，最後原來係佢嘅頸椎有事，壓住喉嚨，王傑話：「醫生重懷疑我生骨刺，所以𠵱家要慢慢醫，佢又叫我唔好做過激嘅動作，最好就係做物理治療。」
古裝劇《皆大歡喜》嘅藝員薛家燕、車婉婉、陳彥行同趙學而等，噚日喺電視城古裝街，拍攝一場飾演皇上嘅劉丹監察起茅廁進度嘅戲份。因藝員眾多，搞到拍攝時間長咗，佢哋喺酷熱天氣下拍攝，非常辛苦，好彩每人都有一把手提電風扇散熱。而好姨重自攜冰水解暑，佢話：「天氣太熱，唔飲啲嘢會好容易中暑，我條頸重熱到生熱痱。」