周日去馬會飲茶，大家繼續講金管局總裁任志剛辭任馬會董事一事，非常之多八卦，不過八方發覺大家都係靠估，究竟任總係咪被人迫走？俾邊個迫走？講極都講唔清楚。
資深會員話，馬會董事局負責監管整個馬會運作，權力好大，成員包括主席、副主席和十位董事。呢十位董事，由遴選會員互相推選出任，當一般會員被董事局邀請成為遴選會員後（每年名額不超過二百名），有興趣做董事者，先要得到另外兩名遴選會員的書面提名。到會員大會，二百名遴選會員會選出新任董事局人選，當選者任期三年，三年任期屆滿後可再競選連任。曾在賽日當值競賽董事者，當選董事的機會較普通遴選會員為高。
有個知情者話，任志剛做監場董事，出名精明，一切都逃唔過佢之法眼，佢唔撈係馬會損失。知情者又話，新問責局長一上場，任總就陪唐英年一齊離任，九成同班局長有關；人家唐公子都專心公務，你冇理由唔睇住金融市場，而去睇住個馬場啩？
八方聽佢咁講又有啲道理，於是去問財經事務及庫務局局長馬時亨，馬局長話，任總單嘢一定唔關佢事，第一，佢同任總嘅關係重要時間搞清楚；其次，佢雖然做咗十年馬會會員，但好日都唔跑馬，最多一年去一次，所以對馬會嘅嘢一無所知，打高球呢佢就識講吓。
咁馬局長有冇同任總打過高球呢？答案係冇。皆因兩人唔同球會，馬仔多數去大陸打波，而任總就係最尊貴之粉嶺HongKongGolfClub會員，呢個會籍，阿松都輪咗十年先至輪到。
傳真︰2623-9278
電郵︰