身在美國的友人電郵來說這幾天有得震冇得瞓，因為驚恐怖份子趁國慶日又來侵襲。執筆時已是七月四日的下午，睇嚟水盡鵝飛，大步檻過。
拉登前排借電視台發表講話，作為一個編劇，覺得拉登的講稿內容實在寫得剛柔並重，越諗越得人驚：「請真主讓我們殉教，讓我們犧牲後再重生，然後再殉教」；加上一流的美術及服裝指導：瘦削的臉龐、無高低的語調、適量的身體語言及一套迷彩戰衣，加加埋埋成為一段好拋得窒人嘅訊息。唔係話長拉登志氣，滅誰人的威風，只不過係想話拉登真係比好多傳媒人更識得利用傳媒力量。
以美軍為首的各國戰隊經已深入阿富汗好一段時間，望嚟望去都係荒山野嶺，炸嚟炸去都係山窿及黃沙地，想揪出真兇真是談何容易。當地居民又唔肯做鬼頭仔，冇人願意篤背脊，一藏萬找，搵多十幾廿年都未必搵到。
要早日完成任務，相信要令全球人士再次對呢件事多加注意，不妨考慮徵召世界盃英雄入伍，施丹任指揮官，碧咸做隊長，奧雲、亨利、朗拿度衝鋒陷陣，李華度做情報員，朗拿甸奴與卡路士負責射大炮。如此陣容壓境，全球電視台必會二十四小時現場直播，全世界將會昅到實，睇見奧雲與亨利在戰場上走嚟走去，險死還生，球迷們必定會覺得牙煙兼肉緊，尤其係女球迷。球迷無分種族宗教，話唔定有個知情球迷會頂唔順，企出嚟告密，咁就一天都光晒。