與賓架陳飲完茶，路經大馬路最繁忙嘅路口──馬莎門前嘅斑馬線，撞到大教授，大教授話佢上中環到銀行辦啲事，預備搭地鐵轉火車返沙田，既然難得出城，大家傾多幾句，問佢校長由馬料水殺上亞厘畢道，點睇？
大教授話：「校長冇錯係好叻好叻嘅人，一生無風無浪，平步青雲，既靠雄厚背景，亦有真正實力，佢做校長，可說完美。佢以前管醫學院，冇鬼佬教授敢玩嘢，做咗校長之後，大學進步得好快，直逼港大。如果佢做多十年，中大肯定成為亞洲第一名校！」
講得咁巴閉，校長走咗，大學咪閉翳？大教授話：「正是如此，佢夠權威，唔怕事，唔講人情，大學人人俾佢逼到索氣，教務長秘書長氣都咳，劉兆佳太太周時夜晚九點先至放工，𠵱家大學突然真空，搵新校長可能搞好耐，期間只有caretaker，點可以放手做嘢吖。校長其實留喺大學重好，𠵱家佢走入官場，怕佢威慣、贏慣之後，貪勝不知輸，碰上滑鐵盧啫。」
大教授言下之意，就係校長轉行做官，肯定係大學之失，但未必係特首之得，教育界嘅利益關係複雜，好多人唔係為咗教育而教育，要改革，要重新分配資源，有如拮穿黃蜂竇，唔小心就會搞到面腫腫。不過話得說回來，如果唔係校長咁勇之人，會有邊個肯為董特首捱義氣吖。