夏季又係白茄子盛產期，早兩日行經菜檔已經可以搵到白茄子嘅蹤影，相熟檔主知我鍾意食茄子，即時預留咗啲畀我，重話今年啲白茄品質靚且又抵食㖭！
白茄子Size比紫茄略細，但食落頗粉糯。炎炎夏日無乜胃口，我肥師奶就會以茄子做涼拌，先將茄子蒸熟，拌以醬汁、麻油等，再雪凍食，一嚟無咁肥膩，二嚟又消暑。高血壓者，多食茄子嘅話更有助降血壓㖭，經濟而又實惠。
$4.8-$5.5/斤 部份菜檔有售
台灣九孔鮑仔一向供應都幾穩定，差別就在於大細同價錢。呢排我見到啲台灣鮑仔數量多咗，連Size都好似大咗，所以忍唔住都買啲返屋企煮。
平日鮑仔都同耳仔一般大，但呢排嘅就大過耳仔少少，肉比較厚身，開邊加蒜頭去蒸最正。不過價錢相對細隻時較貴約十蚊斤，但物有所值。
$96-$112/斤 各大魚檔有售
文：肥師奶