美股上周五急升，小初噚日見到經紀黃，佢眉開眼笑話，今日港股實大升，大把股份可以炒作。其實早排個市就算唔好，好多二三線股仔玩緊大逃亡之時，仍然有個別股仔周圍搵人幫手，埋班炒作。
經紀黃話，早兩個星期，又聽到有人想炒中國數碼信息（250）。講真句，小初就唔係太睇好，因覺得隻股唔易炒。
中國數碼信息在4月份開始，無論股價同成交量都急升，由3仙幾掃到上去接近10仙，之後就反覆回落，上周五跌1.54%，收6.4仙。
小初覺得中國數碼信息好難玩，一來係因為發行股數太多，有成139億股，兼且貨源分得散，就算有心人要炒高，相信都要花唔少銀両同人力物力，重有隻股過往發行咗唔少可換股債券，人哋要行使時，莊家未必知道，可能失驚無神出現沽壓。家陣做莊家，除咗有錢之外，重要心水清及識計數，真係唔容易。
慕容小初