賓架陳約飲茶，席間講起《壹週刊》關於唐英年家族嘅封面故事。
賓架陳話：「又寫得幾好喎，唐翔千、唐驥千兩家人嘅源流搞得咁清楚，我都係第一次見。呢啲古仔好吖，唔係一定要夾硬做一啲甚麼名人婚外情嘅踢爆私隱故事啫，我啲老友以前去慣杜老誌，呢啲事邊度值得寫呀，套用句《白宮群英》嘅口頭彈，Thatisanon-story。」
壹仔嘅優良傳統就係資料搜集組夠晒勤力，不惜工本，自創刊以嚟，就成為壹仔嘅主要武器，其他刊物學唔到。講唐英年嘅血統，直情威過Danehill（靚蝦王之父），抵佢發。
賓架陳講講吓，有感而發：「三司十一局之中，唐英年呢個工商及科技局局長最容易做，包保無風無浪，兩位常任秘書長之中，俞宗怡係工商署老手，何宣威呢幾年睇科技，經驗亦豐富；朱培慶亦唔會喺廣播方面畀佢麻煩。五年之後，唐兄出嚟競選特首嘅話，肯定冇瑕疵。其他啲仁兄仁姐就杰咯，李國章搞教育，實會一身都係箭；葉澍堃搞經濟及勞工，失業率會累死佢；梁錦松馬時亨兩兄弟負責財政，為赤字頭都大；廖秀冬、葉劉淑儀、何志平、楊永強等會隨時因暗湧孭鑊；王永平夾在公務員與政府中間，兩面不是人；孫明揚淨係擺平地產界、房屋署居屋嘅利益，已經頭暈；林煥光做特首辦主任，天威難測。我睇成個局就係培養唐英年政治資本，等佢無災無難到公卿。」
佢講到似層層，不過以唐英年工業家背景，搞工商貿易，易過執豆，官仔骨骨做問責高官，過癮到極。