陳豪近日因分別與無綫當家花旦郭羨妮和陳慧珊傳緋聞，令被封為「花旦殺手」的他人氣驟升，但他卻表示與陳慧珊性格雖然十分夾，二人卻只是朋友關係。而在緋聞背後，陳豪更遭其馬來西亞女友大興問罪之師。
現年三十一歲的陳豪，九四年由模特兒跨界踏足電影業，至今拍過三十二齣電影，處男作為《晚九朝五》，前年起他更跳進電視圈，短短兩年接拍八部電視劇。雖然陳豪產量相當驚人，但直至近月來他與無綫兩大當家花旦陳慧珊和郭羨妮傳出緋聞，被封「花旦殺手」，陳豪這個名字才開始為人熟識，人氣驟升。事實再次證明，緋聞對知名度的確有幫助。
不過陳豪在緋聞背後，卻換來連串解釋，據筆者所知，陳豪的神秘女友原來是馬來西亞華僑，她聞得男友近日緋聞不斷後，曾向陳豪大興問罪之師。
「其實有邊個女朋友想見到自己男朋友有緋聞先？個個聽到都唔開心啦！不過做得我女朋友就要絕對信任我，我有一個信念，只要鍾意嘅話，就點都可以喺埋一齊。其實我一向唔講感情事，希望有番啲私人空間，我有自己原則，我唔怕俾人跟，但我自己絕對唔會主動去講。」
身高六呎多半吋的陳豪，在過往參與的電影中不是演變態殺手，便是大奸大惡的反派，但現實中的他，卻是同事公認的好好先生，待人謙謙有禮，加上其高大威猛的外形，又難怪深得女士們歡心。據知除了陳慧珊和郭羨妮兩位花旦被指「勁冧」陳豪外，就連鄭伊健舊愛邵美琪（Maggie），也被指早已對陳豪傾慕。陳豪一聽到邵美琪對他傾慕時，竟忽然面紅耳赤起來。
「真係抬舉我，但我真係唔知喎！我之前同Maggie合作拍《車神傳說》（○○年），𠵱家我哋又喺《帝女花》部劇再合作，喺我印象中Maggie好nice，有時我有啲嘢唔明嘅，佢都會教我。我係一個幾戇居嘅人，你問我呢啲嘢，我真係唔知道。」
身為陳豪經理人的許愿，此時禁不住插嘴說：「佢真係幾戇居㗎，有時人哋講到出晒面，佢乜都唔知，好似有次我親眼到有個女明星擺明車馬媾佢，佢都竟然無動於衷唔知發生乜嘢事。」許愿又表示，雖然陳豪入行以來不時有機會接觸不同異性，但他卻不大喜歡與圈中人交往，許愿並戲言：「與其話佢係『花旦殺手』，不如話佢俾花旦殺重嚟得貼切！」
那麼，對陳豪而言「花旦殺手」這個封號究竟是褒是貶？對陳慧珊和郭羨妮兩位緋聞女友又有何特別感覺？
「對呢個名，我只係得啖笑，冇乜特別感覺；郭羨妮做事好認真，為人好nice；而Flora（陳慧珊），我同佢好多地方好夾，性格又相似，所以成日一齊玩，開吓玩笑。但係我嘅界線分得好清楚，朋友就朋友，唔會將朋友當女朋友，而且，我對緋聞只係得啖笑，唔會擔心亦唔會嬲，更加唔會因為人哋點寫而唔同人哋做朋友，亦唔會理人地點睇，與其花時間去嬲去發𤷪𤺧，不如將啲時間做好自己工作啦！不過，我反而擔心Flora同郭羨妮，始終傳呢啲新聞對女仔唔多好，所以我後尾都有打電話問候佢哋，知道佢哋冇事我先至放心咋。」
陳豪如此細心體貼，難怪會贏盡美女歡心！