姚嘉妮、康華、奀妹傅天穎、譚俊彥同周海媚前男友、模特兒林偉亮，噚日喺「藍灣半島2002PrivateShop及HOM2002火熱水着騷」活動上，以性感水着配勁歌熱舞行catwalk，姚嘉妮重俾周海媚前度男友林偉亮嘅手踭，撞到個胸㖭。
當時姚嘉妮喺台上企定定擺緊甫士，而身旁嘅林偉亮就大跳勁舞，就係咁俾林偉亮嘅手踭撞到個胸。事後問番姚嘉妮，佢話唔覺俾人撞，重話寧願俾人撞，都好過走光。
至於奀妹雖然話減緊肥，但係佢個patpat依然係台上最大嗰個，睇嚟真係要繼續努力。而狄龍個仔譚俊彥就大晒腳上紋身，重話等晒黑啲先補番啲顏色上去。
李彩樺、許志安、方力申同鄧健泓，將會喺九月底同商台森美小儀合演舞台劇《奪標》，噚日李彩樺、方力申同鄧健泓一齊去咗商台做評判，揀選適合嘅聽眾一齊做呢個舞台劇。李彩樺重即席舞刀弄劍，佢話：「個劇裏面講方力申暗戀我，其實我亦都暗戀過人，不過後來嗰個人鍾意咗第二個。」
鄭中基父親鄭東漢六月離開環球，馮仁昭收到消息話聽日會正式公布，鄭東漢八月一日上任EMI嘅遠東區總裁。其實話鄭東漢過檔EMI都傳咗好耐，重話會拉埋正東黃栢高（Paco）一齊走，但當事人始終唔認，𠵱家好似話今年底約滿正東嘅Paco都重未諗定跟唔跟鄭東漢走。
曾被牽涉入女星賣淫事件嘅嚴淑明，最近搵咗台灣政壇奇女子璩美鳳經理人炮哥（尤皓平），做佢台灣經理人，幫佢接登台騷、出寫真同拍廣告，聽講遲啲炮哥重會安排璩美鳳同嚴淑明一齊演出，大搞噱頭。呢位炮哥原來好鍾意搵是非多多嘅藝人，認為愈難做就愈有挑戰性喎。
鄺美雲噚日去沙田出席「滙豐香港新世紀勁買」活動，同大家分享買珠寶嘅心得。鄺美雲噚日戴咗隻過百萬嘅方形鑽石戒指，佢話買鑽石應該由細買起，能力負擔得到先買啲大粒嘅，佢重話：「珠寶始終係奢侈品，生活必需嘅最緊要都係有屋住、有飯食行先。」
李克勤噚日同其中六位候選港姐，喺電視城為才藝表演嘅歌藝項目綵排。克勤話好多謝無綫，佢話：「二十號就會播我嘅音樂特輯，都係TVB畀面，咁啱配合到我隻新碟。」
另外，克勤噚日又同劉青雲出席《小馬王》記者會，佢話會幫電影唱主題曲。