千呼萬喚嘅「長命科技」（長江生命科技，8222）招股將會喺今個禮拜二收爐，雖然之前好多市場友好對呢隻股票非常睇好，話有李超人個名照住，要再續tom.com（8001）神話絕對無問題。不過伏勝似乎就感覺唔到有乜嘢神話將會發生，隻股雖有暗盤價，但一直都係有價無市，而且重由招股前嘅四蚊，落到去得番三個三左右，更加有部份細到唔細嘅蚊型基金都話喺國際配售攞到幾十萬股，而一眾散戶就唔見為呢隻股做出任何瘋狂行為，長科掛牌後要炒上去，真係要考考「所記」嘅真功夫。
伏勝認為，為咗炒生物科技股而大手認購長科嘅股友毋須咁博，皆因如果隻股係好Hot嘅話，根本唔會有你份，就算畀你抽到兩千股又有乜用呢，賺得唔多，不過到時如果畀你中晒，相信你一定會驚到幾晚瞓唔着，到時賺到錢都補唔番。
所以伏勝抽新股嘅宗旨，就係以玩吓嘅心理去克服人貪錢嘅心理，大家倒不如試試抽兩千股玩吓，留番多啲錢玩其他股票重好啦，尤其係美股上星期五咁樣升法，星期一開市包保大把好嘢畀你玩。
另一隻有生物科技而過往業績亦「好過」長科嘅股份，大家可以留意吓，就係隻香港葯業（182），聽講佢哋轉咗舵手之後，已經開始一連串嘅行動，包括引入國內新投資者，希望可以借助外力將公司引領到真正嘅生物科技領域。睇番隻股過去一個月嘅走勢，似乎已經有人睇好而跟入，雖然𠵱家重未起飛，大家不妨留意一下，因為班好友話隻股嘅目標價大概係個八，但要事先聲明，間公司舊年重係蝕緊錢，唔捱得風險嘅就千祈唔好上車。
伏勝