首富李嘉誠最近將旗下生產化肥嘅長江生化科技分拆上市，吸引到唔少人認購。話晒係首富，自然樹大招風，一間名為GPHoldings嘅公司就趁長科招股，噚日走出嚟話要討回公道咁話。今次成為「磨心」嘅係身家十億嘅科學家、長科首席科學家兼第三大股東張令玉。
張令玉有乜咁巴閉呢？佢發明咗一種MAB技術，可用微生物製造肥料，於是佢老友就成立咗GP，生產呢種名為田力寶嘅化肥，又幫張令玉攞MAB嘅專利權。不過，九九年張令玉將專利權轉畀GP。
GP行政總監戴婉真攞晒文件出嚟做證，佢話幾個月前阿張突然失蹤，五月初GP重接到長科嘅律師信，要求GP刪除網站上有關張氏的資料。由於GP要靠張令玉提供嘅微生物才可生產，張氏轉投誠哥懷抱，GP可能面臨停產。
睇住張令玉過檔長科，袋咗幾億元兼獲誠哥送九億元嘅長科股份，舊拍檔好難冇感覺，但唔知點解收咗律師信兩個月到𠵱家至行動。雖然又話要告又話索償，但GP根本重未入稟。
至於誠哥嗰方面亦有先見之明，所以喺長科招股書表明張令玉同GP嘅轇轕，日後有乜法律追討，全部由張令玉孭起。
傳真︰2623-9278
電郵︰