保頓為咗令球員強壯啲，竟然諗到將佢哋放喺雪櫃度雪三分鐘；之但係，一個唔覺意搞到啲球員病晒，到時真係得不償失。
聽講保頓會去波蘭進行為期十日嘅季前集訓，重會利用當地嘅奧運設施嚟訓練球員嘅體能，當中包括要佢哋喺一個攝氏零度以下嘅雪櫃企三分鐘。佢哋嘅藥物及科學部門主管泰萊就咁話：「啲頂級運動員都係咁訓練，希望班球員經過呢次特訓之後，身體可以變得強壯啲。」
不過我求大俠就認為個個人嘅體質唔同，有啲人怕熱，有啲人怕凍，企雪櫃呢種特訓真係未必人人都頂得住，一個唔好彩，重好容易搞到病㖭。其實，踢得波嘅人，身體有番咁上吓壯健，只要平時再蒲少啲同飲少啲酒，應該可以好健康。
前晚漢文對曉域治場溫布頓男單四強賽，因為落雨關係，打吓停吓，打吓又停吓，三盤波結果打咗成四、五粒鐘。或者人會認為，喺比賽場地加個上蓋，咁就可以一了百了，但係咁就會破壞咗溫布頓嘅傳統。如果睇溫布頓見唔到雨水，咁就唔係溫布頓啦！
高路斯喺今屆世界盃着十一號波衫，非常老利，頂入五粒之餘，又幫德國攞咗個亞軍，所以就要求凱沙羅頓喺今個球季，畀件十一號波衫佢。至於原來着十一號嘅添美，就要改着二十二號。換轉喺上季，睇怕冇人會理佢，但鬼叫佢𠵱家喺德甲聯人氣咁勁咩，梗係為自己爭取吓啦。