凌志IS200同豐田Altezza係姊妹車，客路雖然各有不同，但如果買自動波Altezza嘅用家，唔多唔少都會順便考慮埋IS200；所以，兩者喺二手市場始終有些少競爭，過往Altezza二手價同IS200鬥到叮噹馬頭，但近年拉登累事，兼且Altezza俾保險公司列為高危飛仔車，買保險貴到你唔信，因而導致近半年二手價急挫。同年份IS200嘅二手價，家陣可以賣貴Altezza15%或以上。
保險問題令到Altezza客人難於出車，相反IS200形象斯文，有凌志嘜頭，口碑有保證，而且係後輪驅動小房車，操控水平有番咁上下，鍾意Sporty或享受舒適嘅用家，可謂一網打盡；另外由於客源穩定，足以支持IS200嘅二手價保持強勢，故此預料喺未來兩三年，二手價只會有秩序回落，唔會出現如Altezza般嘅快速調整。
市場上放盤嘅IS200以Premium版居多，約佔總數6成半；Premium即係4前速自動波配真皮車廂嘅版本，豪華程度最高，當年新車價一直高企於29萬元以上，至近月才回落至27萬元；而1999年嘅IS200，目前二手價穩企在15萬元水平，2000年車則值17至18萬，落地3年才折讓一半，保值能力拍得住寶馬3系。
有興趣買二手IS200嘅用家，要注意Premium版本身沒有尾翼及包圍，但代理當年把Sport版嘅擾流套裝，列為Premium型嘅附加裝備，即是有包圍嘅放盤係增值項目，會較值錢；不過，太多改裝料嘅IS200亦唔一定好，部份車主會將IS200當係Altezza咁改，淨係改裝料隨時過10萬元以上，但小心改直出喉或行車電腦，隨時會惹上官非，小心為上。
IS200以行貨佔九成半以上，但仍要提防部份車主將部Altezza換上全車Lexus及IS200嘅Logo；唔想誤中副車，除認明軚環中央係凌志嘜頭先係正貨外，Altezza用直四偈，而IS200則係行直六機器，當踩brake時，IS200中間嘅兩盞尾燈係唔會着嘅，當然最後一關係睇牌簿最穩陣啦！由於IS200年份頂多都係3年左右，正常情況並未出現重大故障，如果係0手車的話，就更加仍在保養期內，買車前最好check清楚上手車主是否定期返廠做Service；如果不定期返代理作保養檢查的話，保用條款會隨時失效，如賣方無故拒絕交出維修紀錄以供查閱，就要提高警覺喇。