康華曾喺無綫電視劇《娛樂反斗星》中扮王菲，佢同馮仁昭講佢自己都好鍾意王菲，所以日前佢去廣州登台都獻唱王菲嘅歌曲。
問到康華邊首係佢嘅「飲歌」？佢話：「咪王菲嘅《給自己的情書》。」曾喺電視劇扮過王菲嘅康華，佢話呢排都有留意王菲同謝霆鋒嘅復合新聞。佢話：「我唔贊成佢哋再喺埋一齊，因為王菲之前都受過一次傷，唔應該再踩返落個氹度。」
康華日前喺廣州登台，除咗有五位數字酬金之外，佢重得到現場觀眾嘅熱烈支持。佢話好彩大會安排咗保安築起人牆，先至可以阻止歌迷湧上台。康華話每次遇到呢啲混亂場面，都有一套防止被博懵嘅方法，康華話：「我除咗會小心護胸，重會起手踭跟歌迷保持一段距離，咁樣安全啲。」
英皇今年力捧新人周英杰（Bernard）同英皇三小花之一嘅蔣雅文（Mandy），繼上年Twins幫百老匯電器公司拍咗廣告後，今年就由Bernard同Mandy拍新一輯廣告。
因為配合夏天促銷，佢兩個以全身運動造型亮相，開頭攝影師要求佢兩個做少少親熱動作，Bernard同Mandy都有少少尷尬，但年輕男女玩玩吓就熟絡，後來直情好似真情侶咁放，拍出嚟效果都唔錯。
麥紹棠嘅囝囝麥浚龍（Juno）近日進軍歌壇，佢重搵咗安室奈美惠嘅老公阿Sam幫佢排舞，噚日阿Sam就由日本嚟香港五日，今次佢專程嚟撐徒弟Juno場，出席佢嘅演唱會。而Juno重特登送咗部千六蚊嘅手提電話畀師傅。
張惠妹舊愛周立璟嘅緋聞女友陳穎妍，前晚喺灣仔出席電影首映禮。
陳穎妍重自爆有個圈外男友，但佢否認嗰個係緋聞男友周立璟。佢話：「我同周立璟係朋友啫，我覺得同圈外人交往圈子冇咁窄，𠵱家我同新男友拍咗拖大約四個月。」